വയനാട്ടിലുണ്ടായ ഉരുൾപൊട്ടലിൽ ഉറ്റവരെ നഷ്ടപ്പെട്ട ശ്രുതിയുടെ പ്രതിശ്രുത വരൻ ജെൻസന്റെ വിയോഗത്തിൽ ദു:ഖം രേഖപ്പെടുത്തി മഞ്ജു വാര്യർ. ശ്രുതിയുടെ വേദന ഒരു വാക്കിനും ഉൾക്കൊള്ളാനാകില്ലെന്നും കാലമേ എന്തിനാണിത്ര ക്രൂരതയെന്നും മഞ്ജു സാമൂഹ്യമാധ്യമത്തിൽ പങ്കുവെച്ച കുറിപ്പിൽ വ്യക്തമാക്കി.
“ഒരു വാക്കിനും ഉൾക്കൊള്ളാനാകില്ല ശ്രുതിയുടെ വേദന. ഒരു കൈത്തലത്തിനും തുടയ്ക്കാനാകില്ല ആ പെൺകുട്ടിയുടെ കണ്ണീർ. ഉരുൾപൊട്ടലിൽ എല്ലാം നഷ്‌ടമായ അവളുടെ കരംപിടിച്ച ജെൻസൻ എന്ന നന്മയെയും മരണം കൊണ്ടുപോകുമ്പോൾ കാലമേ എന്തിനിത്ര ക്രൂരത എന്നുമാത്രം ചോദിച്ചുപോകുന്നു. ഇനി ലോകമൊന്നാകെ ശ്രുതിക്ക് കുട്ടാകട്ടെ…അവളെ ഏറ്റെടുക്കട്ടെ..” എന്നാണ് മഞ്ജു വാര്യർ കുറിച്ചത്.
കഴി‍ഞ്ഞ ദിവസം വയനാട്ടിലുണ്ടായ വാഹനാപകടത്തിൽ മരണപ്പെട്ട ജെൻസന്റെ സംസ്കാരം ഇന്നലെയാണ് കഴിഞ്ഞത്. അതേസമയം, അപകടത്തിൽ കാലിന് പരിക്കേറ്റ ശ്രുതി ഇപ്പോഴും ആശുപത്രിയിൽ ചികിത്സയിലാണ്.
