ആമിർ ഖാൻ നായകനായ ത്രീ ഇഡിയറ്റ്സി’ലൂടെ ശ്രദ്ധേയനായ നടൻ അഖിൽ മിശ്ര (67) അന്തരിച്ചു. ഹൈദരാബാദിലെ താമസസ്ഥലത്തെ അടുക്കളയിൽ മരിച്ചനിലയിൽ കാണപ്പെടുകയായിരുന്നു. സ്റ്റൂളിൽ കയറി എന്തോ ചെയ്യാൻ ശ്രമിക്കുന്നതിനിടെ താഴെ വീണ് തലയ്ക്ക് പരുക്കേൽക്കുകയായിരുന്നു. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മിശ്രയുടെ സുഹൃത്ത് കുൽവീന്ദർ ബക്ഷിയാണ് നടന്റെ മരണം സ്ഥിരീകരിച്ചത്.
ഹൈദരാബാദിൽ ഷൂട്ടിങ്ങിനായി എത്തിയതായിരുന്നു അഖിൽ മിശ്ര. ത്രീ ഇഡിയറ്റ്സിലെ ലൈബ്രേറിയൻ ഡുബൈയെ അവതരിപ്പിച്ചതിലൂടെയാണ് അഖിൽ മിശ്ര ശ്രദ്ധേയനായത്. ഡോൺ, ഗാന്ധി മൈ ഫാദർ, ശിഖർ തുടങ്ങിയവയാണ് അഖിൽ മിശ്ര അഭിനയിച്ച് ശ്രദ്ധേയമായ ചിത്രങ്ങൾ. നിരവധി ടെലിവിഷൻ ഷോകളിലും അഖിൽ മിശ്രയുടെ സാന്നിധ്യമുണ്ടായിരുന്നു. ജർമൻ നടി സുചെയ് ബെർണർട്ട് ആണ് ഭാര്യ.
