ചരിത്ര ദൗത്യം പൂർത്തിയാക്കി ബഹിരാകാശ സഞ്ചാരി സുൽത്താൻ അൽ നെയാദി ഇന്ന് യുഎഇയിൽ മടങ്ങിയെത്തും. നെയാദിക്ക് വമ്പൻ സ്വീകരണം ഒരുക്കാനുളള തയ്യാറെടുപ്പിലാണ് മാതൃരാജ്യം. ബഹിരാകാശ നിലയത്തിൽ നിന്നും തിരിച്ചെത്തിയ അൽ നെയാദി അമേരിക്കയിലെ ഹൂസ്റ്റണിൽ വിവിധ ആരോഗ്യ പരിശോധനകൾക്ക് വിധേയനായിരുന്നു.
നെയാദിക്ക് സ്വീകരണം ഒരുക്കാനുളള എല്ലാ തയ്യാറെടുപ്പുകളും പൂർത്തിയായതായി മുഹമ്മദ് ബിൻ റാഷിദ് സ്‌പെയ്‌സ് സെന്റർ അറിയിച്ചു. അബൂദബി വിമാനത്താവളത്തിൽ നെയാദി എത്തുമ്പോൾ അറബ് കലാരൂപങ്ങളുടെ അകമ്പടിയോടെയാകും അദ്ദേഹത്തെ വരവേൽക്കുക.
റോഡ് ഷോ ഉൾപ്പെടെയുളള പരിപാടികളാണ് ആസൂത്രണം ചെയ്തിരിക്കുന്നത്. ഭരണകർത്താക്കളുമായുളള കൂടിക്കാഴ്ച, സംവാദങ്ങൾ എന്നിവയും ഇതിന്റെ ഭാഗമായി നടക്കും. ജന്മനാടായ അൽ ഐനിലും പ്രത്യേക സ്വീകരണം ഒരുക്കും. സുൽത്താനെ വരവേറ്റുകൊണ്ട് രാജ്യത്തിന്റെ വിവിധ ഭാഗങ്ങളിൽ ബോർഡുകളും സ്ഥാപിച്ചു.
