ചുവപ്പ് ലൈറ്റ് മറികടന്നാല്‍ അരലക്ഷം ദിര്‍ഹം പി‍ഴ; നിയമം കര്‍ശനമാക്കി അബുദാബി

ചുവപ്പ് ലൈറ്റ് മറികടന്ന് വാഹനമോടിക്കുന്നവർക്ക് മറ്റ് എമിറേറ്റുകളെ അപേക്ഷിച്ച് കടുത്ത ശിക്ഷയുമായി അബുദാബി. നിയമലംഘകരില്‍ നിന്ന് 51,000 ദിര്‍ഹം ഈടാക്കാനാണ് തീരുമാനം. കുറ്റം ആവര്‍ത്തിക്കപ്പെട്ടാല്‍ ലൈസന്‍സും റദ്ദാക്കും. സിഗ്നലുകളിലെ അമിതവേഗം, പച്ച സിഗ്നല്‍ അണയുംമുമ്പുളള തിടുക്കം എന്നിവയും നിയമലംഘനത്തിന്‍റെ പരിധിയില്‍ വരും.

യുഎഇയുടെ ഫെഡറൽ ട്രാഫിക് നിയമം അനുസരിച്ച് ചുവന്ന സിഗ്നലുകളിലൂടെ ഓടുന്ന ലൈറ്റ് വെഹിക്കിൾ വാഹനമോടിക്കുന്നവർക്ക് 1,000 ദിർഹമാണ് പിഴ . ഭാരവാഹനങ്ങൾക്ക് 3000 ദിർഹമാണ് പിഴ. 30 ദിവസത്തേക്ക് വാഹനങ്ങൾ കണ്ടുകെട്ടുകയും വാഹനമോടിക്കുന്നവരുടെ ഡ്രൈവിംഗ് ലൈസൻസിൽ 12 ബ്ലാക്ക് പോയിന്റുകൾ ചേർക്കുകയും ചെയ്യും. പിടിച്ചെടുത്ത കാര്‍ മോചിപ്പിക്കുന്നതിന് ഉടമകൾ 3,000 ദിർഹം ഫീസും നൽകണം.

ഇരട്ടപ്പി‍ഴ ( 50,000+ 1000 )

അബുദാബിയില്‍ പരിഷ്കരിച്ച നിയമം അനുസരിച്ച് പിടിച്ചെടുത്ത വാഹനം വിട്ടുകിട്ടാന്‍ 50,000 ദിര്‍ഹം നല്‍കണം. ഡ്രൈവറുടെ ലൈസന്‍സ് ആറ് മാസത്തേക്ക് തടയുകയും ചെയ്യും. വാഹനങ്ങൾ തിരിച്ചെടുത്തില്ലെങ്കില്‍ ലേലം ചെയ്യുമെന്നും അധികൃതര്‍ വ്യക്തമാക്കി. ചുവപ്പ് സിഗ്നല്‍ മറികടക്കുന്ന വാഹനങ്ങൾ പിടിച്ചെടുക്കുന്നതോടെ ഉടമയ്ക്ക് അരലക്ഷത്തില്‍ അധികം ദിര്‍ഹമാണ് പി‍ഴയായി നല്‍കേണ്ടി വരിക.

ലേലം ചെയ്യും

2020 സെപ്റ്റംബറില്‍ കൊണ്ടുവന്ന നിയമമാണ് അബുദാബി കര്‍ശനമാക്കുന്നത്. ഇത് സംബന്ധിച്ച് അബുദാബി പോലീസ് സോഷ്യൽ മീഡിയ ചാനലുകളിൽ മുന്നറിയിപ്പ് നല്‍കിയിട്ടുണ്ട്. പിഴയടച്ചില്ലെങ്കിൽ മൂന്നു മാസത്തിനകം കണ്ടുകെട്ടിയ കാറുകൾ വാഹനങ്ങൾ ലേലം ചെയ്യുമെന്നാണ് അറിയിപ്പ്. ലൈറ്റുകൾ മറികടക്കുന്നതിലെ അപകടസാധ്യത വ്യാക്തമാക്കുന്ന വീഡിയോകളും പൊലീസ് പങ്കുവച്ചു.

കണക്കുകൾ ഇങ്ങനെ

അശ്രദ്ധമായ ഡ്രൈവിംഗും ശ്രദ്ധക്കുറവും കാരണം ചുവന്ന ലൈറ്റുകൾ ചാടിയതിന് കഴിഞ്ഞ വർഷം 2,850 ഡ്രൈവർമാര്‍ക്ക് പിഴ ചുമത്തിയതായാണ് കണക്കുകൾ. 2021-ലെ 1,762 വാഹനാപകടങ്ങളിൽ 11 ശതമാനവും (205) ചുവന്ന ലൈറ്റുകൾ മറികടന്നത് മൂലമാണെന്നും ആഭ്യന്തര മന്ത്രാലയത്തിന്റെ കണക്കുകൾ സൂചിപ്പിക്കുന്ന. ഇത് ആറ് മരണങ്ങൾക്കും 199 പേർക്ക് പരിക്കേൽക്കുന്നതിനും കാരണമായി.

ദുബായിലെ ട്രാംവേയിലും

അതേസമയം, ദുബായിലെ ട്രാംവേ ഇന്റർസെക്ഷനുകളിൽ ചുവന്ന ലൈറ്റുകൾ ചാടുകയും മാരകമായ അപകടങ്ങൾ ഉണ്ടാക്കുകയും ചെയ്യുന്ന ഡ്രൈവർമാർക്ക് 15,000 ദിർഹം മുതൽ 30,000 ദിർഹം വരെയാണ് പിഴ ചുമത്തുക. വാഹനമോടിക്കുന്നവരുടെ ഡ്രൈവിംഗ് ലൈസൻസ് മൂന്ന് വർഷം വരെ സസ്പെൻഡ് ചെയ്യും. അപകടത്തിൽ പരിക്കുകൾ ഉൾപ്പെട്ടിട്ടുണ്ടെങ്കിലും മരണം സംഭവിച്ചില്ലെങ്കിൽ ഡ്രൈവർക്ക് 5,000 ദിർഹം മുതൽ 15,000 ദിർഹം വരെ പിഴ ചുമത്തും, ആറ് മുതൽ 12 മാസം വരെ ലൈസൻസ് സസ്പെൻഡ് ചെയ്യുമെന്നും അധികൃതര്‍ വ്യക്തമാക്കി.