യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിക്ക് നാഷണൽ ഓർഡർ ഓഫ് ദി ലെജിയൻ ഓഫ് ഓണർ നൽകി ഫ്രാൻസ്. ശാസ്ത്ര-സാംസ്‌കാരിക – സാഹിത്യ സംഭാവനകൾക്കുളള അംഗീകാരമായാണ് ബഹുമതി. അൽ ബദീ പാലസിൽ നടന്ന ചടങ്ങിൽ യുഎഇയിലെ ഫ്രാൻസ് അംബാസഡർ നിക്കോളാസ് നീംച്ചിനോവാണ് ഷാർജ ഭരണാധികാരിക്ക് പുരസ്കാരം കൈമാറിയത്.
ഫ്രാൻസിലെ ഏറ്റവും ഉയർന്ന ബഹുമതിയാണ് ഗ്രാൻഡ് ഓഫീസർ റാങ്കിലുള്ള നാഷണൽ ഓർഡർ ഓഫ് ദി ലെജിയൻ ഓഫ് ഓണർ. ഇരുരാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നതിന് ശൈഖ് ഡോ. സുൽത്താൻ ബിൻ മുഹമ്മദ് നടത്തുന്ന ശ്രമങ്ങൾക്കുളള അംഗീകാരം കൂടിയാണ് ബഹുമതിയെന്ന് ഫ്രഞ്ച് പ്രസിഡൻ്റ് ഇമ്മാനുവേൽ മാക്രോണും അറിയിച്ചു.
ചടങ്ങിൽ ഷാർജ കിരീടാവകാശിയും ഡെപ്യൂട്ടി ഭരണാധികാരിയുമായ ശൈഖ് സുൽത്താൻ ബിൻ മുഹമ്മദ് ബിൻ സുൽത്താൻ അൽ ഖാസിമിയും പങ്കെടുത്തു. ഷാർജ ഡെപ്യൂട്ടി ഭരണാധികാരികളായ ശൈഖ് അബ്ദുല്ല ബിൻ സലേം ബിൻ സുൽത്താൻ അൽ ഖാസിമി; ശൈഖ് സുൽത്താൻ ബിൻ അഹമ്മദ് ബിൻ സുൽത്താൻ അൽ ഖാസിമി തുടങ്ങിയവരും പങ്കെടുത്തു.
