പെരുന്നാൾ അവധി ദിവസങ്ങളിൽ ജോലി ചെയ്യുന്നവർക്ക് ഇരട്ടി വേതനം വാഗ്ദാനം ചെയ്ത് സ്വകാര്യ കമ്പനികൾ. അവധി ദിനങ്ങളിൽ ജോലി ചെയ്യുന്നവർക്ക് പകരം അവധിയും നൽകും. കൂടാതെ ഇവർക്ക് പാരിതോഷികങ്ങളും ചില കമ്പനികൾ പ്രഖ്യാപിച്ചിട്ടുണ്ട്. അവധി നൽകാത്ത കമ്പനികൾ ജോലി ചെയ്യുന്നവർക്ക് കൂടുതൽ വേതനവും പകരം അവധിയും നൽകണമെന്ന് മാനവവിഭവ, സ്വദേശിവൽക്കരണ മന്ത്രാലയവും നിർദേശിച്ചിട്ടുണ്ട്.
ശനിയാഴ്ച മുതൽ രാജ്യം അവധിയാഘോഷങ്ങളിൽ ഏർപ്പെടും. തിങ്കളാഴ്ച മാത്രമാണ് പ്രവൃത്തി ദിവസം. അന്ന് ലീവ് എടുക്കുകയാണെങ്കിൽ ഒൻപത് ദിവസം അവധി കിട്ടും. കൂടാതെ മധ്യവേനൽ അവധിക്കായി ഇന്നലെ സ്കൂളുകൾ അടച്ചതോടെ പ്രവാസികൾ വാർഷിക അവധി കൂടി ചേർത്ത് നാട്ടിലേക്കുള്ള യാത്രയുടെ ഒരുക്കങ്ങളിലാണ്. എന്നാൽ വിമാന നിരക്ക്‌ കുത്തനെ ഉയർന്നതാണ് ഇപ്പോൾ നാട്ടിലെത്താനുള്ള പ്രവാസികളുടെ മുന്നിലെ ഏക തടസ്സം. അതേസമയം നാട്ടിൽ പോകാതെ രാജ്യത്ത് തന്നെ തുടരുന്നവരെ ലക്ഷ്യമിട്ടാണ് ഇരട്ടി ശമ്പളവും പാരിതോഷികങ്ങളുമായി സ്വകാര്യ കമ്പനികൾ രംഗത്ത് എത്തിയത്. ദിവസ വേതനത്തിന് പുറമെ 50% അധിക വേതനവും നൽകണമെന്നാണ് മന്ത്രാലയത്തിന്റെ ചട്ടം.
സർക്കാർ, സ്വകാര്യ മേഖലയിലെ ജീവനക്കാർക്കും തൊഴിലാളികൾക്കും വർഷത്തിൽ പൂർണ ശമ്പളത്തോടെ അവധി നൽകേണ്ട ദിവസങ്ങളാണിത്. ഹിജ്റ വർഷാരംഭം, നബിദിനം, ഇസ്റ, മിഅറാജ് അവധി, ചെറിയ പെരുന്നാൾ ദിവസങ്ങളിൽ അവധി, പുതുവത്സരദിനം, യുഎഇ ദേശീയ ദിനത്തോട് അനുബന്ധിച്ച് രണ്ട് ദിവസത്തെ അവധി, കൂടാതെ ഹാജിമാർ അറഫയിൽ സംഗമിക്കുന്ന ദിവസമടക്കം ബലിപെരുന്നാളിൽ മൂന്ന് ദിവസം എന്നിവയാണ് പൂർണ വേതനത്തോടു കൂടിയ അവധികൾ.
ഓവർ ടൈം ജോലി ചെയ്യുന്നവർക്ക് 50% അധിക വേതനം യുഎഇയിലെ നിയമം ഉറപ്പ് വരുത്തുന്നുണ്ട്. ആഴ്ചയിൽ ഒരു ദിവസം അവധി നിർബന്ധമാണ്. എന്നാൽ ഈ ദിവസം ജോലി ചെയ്യേണ്ട സാഹചര്യം ഉണ്ടായാൽ അധിക വേതനവും പകരം അവധിയും നൽകണമെന്നാണ് യുഎഇ നിയമം. ഇത്തവണ ബലി പെരുന്നാളിന് നാല് ദിവസം അവധിയും അതിനൊപ്പം ശനിയും ഞായറും വന്നതോടെ ആറ് ദിവസം ജോലി മുടങ്ങുന്ന സാഹചര്യത്തിലാണ് തൊഴിലാളികൾക്ക് ആകർഷകമായ ആനുകൂല്യങ്ങളുമായി സ്വകാര്യ കമ്പനികൾ രംഗത്ത് വന്നത്.
