മിഡിൽ ഈസ്റ്റിലെ ആദ്യത്തെ പരമ്പരാഗത ഹിന്ദു ശിലാക്ഷേത്രം ഫെബ്രുവരിയിൽ പൊതുജനങ്ങൾക്കായി തുറക്കുമെന്ന് BAPS ഹിന്ദു മന്ദിറിന്റെ ഉന്നത പ്രതിനിധികൾ പറഞ്ഞു. ഉദ്ഘാടന ആഘോഷങ്ങൾ ഏറ്റവും വലിയ സൗഹാർദ്ദത്തിന്റെ ഉത്സവം ആയിരിക്കുമെന്നും പ്രതിനിധികൾ അഭിപ്രായപ്പെട്ടു. ഇന്ത്യയുടെ കലയും മൂല്യങ്ങളും സംസ്‌കാരവും യുഎഇയിലേക്ക് കൊണ്ടുവരുന്ന ആഘോഷമായിരിക്കും ഈ ഉത്സവം. അബു മുറൈഖയിലെ 27 ഏക്കർ സ്ഥലത്ത് രൂപമെടുക്കുന്ന ക്ഷേത്രം 2024 ഫെബ്രുവരി 14 ന് വിശുദ്ധ പൂജ്യ മഹന്ത് സ്വാമി മഹാരാജിന്റെ നേതൃത്വത്തിൽ വൈദിക ചടങ്ങുകളോടെ ഉദ്ഘാടനം ചെയ്യും.
ഫെബ്രുവരി 15 ന് സ്വാമി മഹാരാജിന്റെ സാന്നിധ്യത്തിൽ നടക്കുന്ന പൊതു സമർപ്പണ സമ്മേളനത്തിലൂടെ രാജ്യത്തെ ഇന്ത്യൻ കമ്മ്യൂണിറ്റി അംഗങ്ങൾക്ക് ആഘോഷങ്ങളിൽ പങ്കുചേരാനാകും. ഈ ചടങ്ങിൽ പങ്കെടുക്കുന്നതിന് മുൻകൂർ രജിസ്ട്രേഷൻ ആവശ്യമാണ്. ഈ ദിവസത്തിന് മുമ്പുള്ള പരിപാടികളും മതപരമായ ചടങ്ങുകളും രജിസ്റ്റർ ചെയ്തവർക്കും ക്ഷണിക്കപ്പെട്ടവർക്കും മാത്രമായിരിക്കും സംവരണം ചെയ്യുക എന്നും ക്ഷേത്രം പ്രസ്താവനയിൽ പറയുന്നു.
2015 ഓഗസ്റ്റിലാണ് അബുദാബിയിൽ ക്ഷേത്രം നിർമിക്കാൻ യുഎഇ സർക്കാർ സ്ഥലം അനുവദിച്ചത്. ഇന്ത്യൻ പ്രധാനമന്ത്രി നരേന്ദ്ര മോദിയുടെ യുഎഇ സന്ദർശന വേളയിൽ യുഎഇ പ്രസിഡന്റ് ഹിസ് ഹൈനസ് ശൈഖ് മുഹമ്മദ് ബിൻ സായിദ് അൽ നഹ്യാൻ ഭൂമി സമ്മാനിച്ചു. 2018 ഫെബ്രുവരിയിലാണ് തറക്കല്ലിടൽ ചടങ്ങ് നടന്നത്. പിങ്ക് നിറത്തിലുള്ള മണൽക്കല്ല് 1000 വർഷത്തിലേറെ നീണ്ടുനിൽക്കുമെന്ന് പ്രതീക്ഷിക്കുന്നു. ഉദ്ഘാടന ചടങ്ങിനെയും രജിസ്ട്രേഷനെയും കുറിച്ചുള്ള കൂടുതൽ വിവരങ്ങൾക്ക് ഫെസ്റ്റിവൽ ഓഫ് ഹാർമണി ആപ്പ് ഡൗൺലോഡ് ചെയ്യുകയോ https://festivalofharmony.ae എന്ന വെബ്സൈറ്റ് സന്ദർശിക്കുകയോ ചെയ്യാം.
