യുഎഇ സ്വദേശികൾക്കും രാജ്യത്തുള്ള എല്ലാ പ്രവാസികൾക്കും ലഭിച്ചത് കൗതുകമായി ഇന്ത്യയിലെ ലോക്സഭാ തിരഞ്ഞെടുപ്പ് പ്രചാരണത്തിന്റെ ഭാഗമായി ഇന്ത്യൻ പ്രധാനമന്ത്രി നരേന്ദ്രമോദിയുടെ വാട്സാപ് സന്ദേശം. ഇന്ത്യൻ ഇലക്ട്രോണിക്സ് ആൻഡ‍് ഇൻഫർമേഷൻ ടെക്നോളജിയുടെ ‘വികസിത് ഭാരത് സമ്പർക്ക്’ എന്നെഴുതിയ വാട്സാപ് നമ്പരിൽ നിന്നാണ് മോദി സർക്കാരിന്റെ നേട്ടങ്ങൾ വിവരിച്ചുകൊണ്ടുള്ള സന്ദേശം യുഎഇ നിവാസികളുടെ മൊബൈലുകളിൽ എത്തിയത്.
അതേസമയം, സന്ദേശമെന്തെന്ന് പെട്ടെന്ന് മനസിലാകാതിരുന്ന യുഎഇയിലെ പാക്കിസ്ഥാനികൾ ഇത്തിരി ആശങ്കപ്പെട്ടപ്പോൾ മറ്റു രാജ്യക്കാർക്കെല്ലാം ഇത് വലിയൊരു കൗതുകമായി മാറി. ഇൻസ്റ്റഗ്രാമിലെ ‘ലവ് ഇൻ ദുബായ്’ എന്ന പേജിൽ സന്ദേശം എല്ലാവർക്കും ലഭിച്ച കാര്യം മോദിയുടെ ചിത്രത്തോടൊപ്പം പോസ്റ്റ് ചെയ്തപ്പോൾ നിരവധി രസകരമായ കമന്റുകളും എത്തി.
