യുഎഇയിലും മിഡിൽ ഈസ്റ്റ് മേഖലയിലും ആദ്യമായി ഹെവി ഡ്യൂട്ടി ഇലക്ട്രിക് ട്രക്ക് പുറത്തിറക്കി അൽ-ഫുത്തൈം ഓട്ടോ ആൻഡ് മെഷിനറി കമ്പനി (ഫാംകോ)രംഗത്ത്. 40 ടൺ ശേഷിയുളളതാണ് സ്വീഡനിലെ ഓട്ടോമൊബൈൽ ഭീമനായ വോൾവോ നിർമ്മിക്കുന്ന ഹെവി ഡ്യൂട്ടി ഇലക്ട്രിക് ട്രക്ക് .
ട്രക്കിന് ഫുൾ ചാർജിൽ 300 കിലോമീറ്റർ ഓടാൻ കഴിയും. ഡിസി മോഡിൽ പൂർണ്ണമായി റീചാർജ് ചെയ്യാൻ 2.5 മണിക്കൂറും എസി മോഡിൽ 9.5 മണിക്കൂറും മാത്രമേ എടുക്കൂവെന്നും നിർമ്മാതാക്കൾ പറയുന്നു. ചാർജ് ചെയ്യപ്പെടുന്ന ഏറ്റവും വേഗതയേറിയ വാഹനങ്ങളിലൊന്നാണ് ഇതെന്നും ചൂടും തണുപ്പും ഉള്ള കാലാവസ്ഥയിൽ പരീക്ഷിച്ച് വിജയം ഉറപ്പാക്കിയിട്ടുണ്ടെന്നും ഫാംകോയിലെ യുഎഇ, സൗദി, ഖത്തർ എന്നിവിടങ്ങളിലെ വ്യവസായ ഉപകരണങ്ങളുടെ മാനേജിംഗ് ഡയറക്ടർ റമേസ് ഹംദാൻ പറഞ്ഞു.
ഇ-ട്രക്കിൻ്റെ മൊത്തം വില ഡീസൽ ഉപയോഗിച്ച് പ്രവർത്തിക്കുന്ന ട്രക്കിനെക്കാൾ വളരെ കുറവാണ്. വാഹനത്തിൻ്റെ പ്രവർത്തനരഹിതമായ സമയവും ഡീസൽ ഉപഭോഗച്ചെലവും കണക്കിലെടുക്കുമ്പോൾ മികച്ച നേട്ടമാണ് പുതിയ ട്രക്ക് സമ്മാനിക്കുന്നത്. 65 ശതമാനത്തോളം ചെലവ് ചുരക്കാനാകുമെന്നാണ് പ്രതീക്ഷ. ഇ- ട്രക്കിന് സൌജന്യ പാർക്കിംഗ്, സാലിക് ഇളവുകളും യുഎഇയിൽ ലഭ്യമാണ്. നെറ്റ് സീറോ 2050 എന്ന ലക്ഷ്യം മുൻനിർത്തിയാണ് ഇളവുകൾ നൽകുന്നത്.
ട്രക്കുകൾ പ്രധാനമായും എഫ്എംസിജി ചരക്ക് കടത്ത്, ലോജിസ്റ്റിക്സ് എന്നീ മേഖലകളിലാണ് ഉപയോഗപ്പെടുത്തുക. 10 വർഷത്തെ വാറൻ്റിയും സേവന കരാറുമായാണ് ട്രക്ക് വരുന്നത്. ആദ്യ വാഹനം യൂണിലിവർ സ്വന്തമാക്കിയെന്നും കൂടുതൽ വാഹനങ്ങൾ ഉടൻ നിരത്തിലിറങ്ങുമെന്നും കമ്പനി സൂചിപ്പിക്കുന്നു. എന്നാൽ പുതുതായി പുറത്തിറക്കിയ ഇ-ട്രക്കിന്റെ വില കമ്പനി വെളിപ്പെടുത്തിയിട്ടില്ല.
