സുരേഷ് ഗോപി നായകനായെത്തുന്ന ത്രില്ലർ ചിത്രം റിലീസിങ്ങിന് ഒരുങ്ങുന്നു. സ്ഥിരം പൊലീസ് വേഷങ്ങളിൽ നിന്ന വ്യത്യസ്തമായ സിനിമയെന്നും സംവിധായകൻ്റെ അഭിരുചിക്ക് അനുസരിച്ചാണ് അഭിനയിച്ചിരിക്കുന്നതെന്നും സുരേഷ് ഗോപി പറഞ്ഞു. ദുബായിൽ നടന്ന പ്രമോഷൻ പരിപാടിയിലാണ് താരത്തിൻ്റെ പ്രതികരണം.
നീതിക്കുവേണ്ടി പോരാടുന്ന പോലീസ് ഓഫീസറുടെയും ഒരു കോളേജ് പ്രൊഫസറുടെയും കഥയാണ് ആവിഷ്കരിച്ചിരിക്കുന്നത്. ചിത്രത്തിൽ കേരള ആംഡ് പോലീസിന്റെ കമാന്റൻ്റ് ആയ ഹരീഷ് മാധവൻ എന്ന കഥാപാത്രമായാണ് സുരേഷ് ഗോപിയെത്തുന്നത്. നിഷാന്ത് എന്ന കോളേജ് പ്രൊഫസറുടെ വേഷത്തിൽ ബിജു മേനോനും ഒപ്പത്തിന് നിൽക്കും. ലീഗൽ ത്രില്ലർ മൂഡിൽ ഒരുങ്ങുന്ന ചിത്രത്തിൻ്റെ ഷൂട്ടിംഗ് കൊച്ചിയിലും ഹൈദരാബാദിലുമായാണ് പൂർത്തിയായത്.
കടുവ,പാപ്പൻ തുടങ്ങിയ ചിത്രങ്ങളുടെ തുടർച്ചയെന്ന നിലയിൽ ഗരുഡൻ ജനങ്ങൾ ഏറ്റെടുക്കുമെന്നാണ് പ്രതീക്ഷയെന്നും സുരേഷ്ഗോപി പറഞ്ഞു. കാലികപ്രസക്തമായ സംഭവങ്ങൾ സിനിമയെ ശ്രദ്ധേയമാക്കുമെന്നും സുരേഷ്ഗോപി കൂട്ടിച്ചേർത്തു.നവംബറിൽ റിലീസ് ചെയ്യാനിരിക്കുന്ന ചിത്രത്തിൻ്റെ ട്രെയിലർ പുറത്തിറങ്ങിക്കഴിഞ്ഞു.
സുരോഷ് ഗോപിക്കൊപ്പം ബിജു മേനോനും സിദ്ദിഖും ജഗദീഷും ഉൾപ്പെടെ വൻ താരനിരയും ചിത്രത്തിലുണ്ട്. ദിലീഷ് പോത്തൻ,അഭിരാമി, ദിവ്യ പിള്ള, തലൈവാസൽ വിജയ്, അർജുൻ നന്ദകുമാർ, മേജർ രവി, ബാലാജി ശർമ,സന്തോഷ് കീഴാറ്റൂർ, രഞ്ജിത്ത് കങ്കോൽ, ജെയ്സ് ജോസ്, മാളവിക, ജോസുകുട്ടി , ചൈതന്യ പ്രകാശ് തുടങ്ങിയവരും പ്രധാന വേഷങ്ങൾ കൈകാര്യം ചെയ്യുന്നുണ്ട്.
അരുൺ വർമയാണ് സംവിധാനം. മിഥുൻ മാനുവൽ തോമസിൻ്റേതാണ് തിരക്കഥ . അജയ് ഡേവിഡ് കാച്ചപ്പള്ളിയുടെ ക്യാമറ , ജെയ്ക്സ് ബിജോയുടെ സംഗീതം എന്നിവയും സിനിമയെ വെത്യസ്തമാക്കും. മാജിക് ഫ്രെയിംസിന്റെ ബാനറില്‍ ലിസിറ്റന്‍ സ്റ്റീഫന്‍ ആണ് ചിത്രം നിര്‍മ്മിക്കുന്നത്.
