ദുബായ് അൽ ഖൈൽ റോഡിലെ നാലാമത്തെ പുതിയ പാലം നാളെ തുറക്കുമെന്ന് ദുബായ് റോഡ്‌സ് ആന്റ് ട്രാൻസ്‌പോർട്ട് അതോറിറ്റി അറിയിച്ചു. അൽ മൈദാൻ സ്ട്രീറ്റിനും റാസൽ ഖോർ സ്ട്രീറ്റിനും ഇടയിൽ ദെയ്‌റയിലേക്കുള്ള പുതിയ 610 മീറ്റർ ഇരുവരി പാലമാണ് തുറക്കുന്നത്.
3,300 മീറ്റർ നീളമുള്ള പാലങ്ങളുടെ നിർമ്മാണവും 6,820 മീറ്ററിലധികം നീളമുള്ള പാതകളുടെ വീതി കൂട്ടലും ഉൾപ്പെടുന്ന പ്രധാന അൽ ഖൈൽ റോഡ് വികസന പദ്ധതി പൂർത്തിയാക്കി തുറക്കുന്ന അൽ ഖൈൽ റോഡിലെ നാലാമത്തെ പാലമാണിത്. പുതിയ പാലത്തിന് മണിക്കൂറിൽ 3,200 വാഹനങ്ങൾ വരെ ഉൾക്കൊള്ളാൻ ശേഷിയുണ്ടാകും.
മൈദാൻ സ്ട്രീറ്റിൽ നിന്ന് അൽ ഖൈൽ റോഡിലേക്ക് ദേരയിലേക്കുള്ള ഗതാഗതത്തെ പാലം ബന്ധിപ്പിക്കും. അൽ ഖൈൽ റോഡിൽ നിന്ന് റാസൽഖോർ സ്ട്രീറ്റിലേക്കുള്ള ഗതാഗതത്തെ ബന്ധിപ്പിക്കുന്ന 1,550 മീറ്ററിൽ ഉപരിതല റോഡ് മെച്ചപ്പെടുത്തലും നടത്തി.
