യുഎഇയില്‍ സന്ദര്‍ശന വിസ കാലാവധി ക‍ഴിഞ്ഞാല്‍ രാജ്യത്ത് തുടരുന്നവര്‍ക്ക് രാജ്യം വിടാന്‍ ഔട്ട് പാസ് നിര്‍ബന്ധമാക്കി. വിമാനത്താവളങ്ങളില്‍ നിന്നോ , കര അതിര്‍ത്തി പോയിന്റുകളിലെ എമിഗ്രേഷന്‍ ഓഫീസുകളില്‍ നിന്നോ ഒൗട്ട് പാസൊ, ലീവ് പെര്‍മിറ്റൊ വാങ്ങണമെന്നാണ് നിര്‍ദ്ദേശം. ദുബൈ ജനറല്‍ ഡയറക്ടറേറ്റ് ഓഫ് റെസിഡന്‍സി ആന്റ് ഫോറിനേഴ്സ് അഫയേഴ്‍സിലെ കസ്റ്റമര്‍ സര്‍വീസ് ഉദ്യോഗസ്ഥരാണ് ഇക്കാര്യം സ്ഥിരീകരിച്ചത്.
വിമാനത്താവളങ്ങൾക്ക് പുറമെ അല്‍ അവീര്‍ ഇമിഗ്രേഷന്‍ ഓഫീസില്‍ നിന്നും ഔട്ട് പാസ് നേടാമെന്നും അധികൃതര്‍ വ്യക്തമാക്കി. വിസാ കാലാവധി കഴിഞ്ഞ ശേഷം അധികമായി രാജ്യത്ത് താമസിക്കുന്ന ഓരോ ദിവസത്തിനും പിഴ അടയ്ക്കേണ്ടതുണ്ട്. പി‍ഴയ്ക്ക് പുറമെ ഔട്ട് പാസിനായും നിശ്ചിത തുക അടയ്ക്കേണ്ടിയും വരും. ഏതാനും ദിവസങ്ങള്‍ക്ക് മുമ്പാണ് പുതിയ നടപടികള്‍ ആരംഭിച്ചതെന്ന് ട്രാവല്‍ ഏജന്‍സികളും പറയുന്നു.
കഴിഞ്ഞ ദിവസങ്ങളില്‍ കാലാവധി കഴിഞ്ഞ വിസയുമായി വിമാനത്താവളത്തിലെത്തിയ പലര്‍ക്കും ഔട്ട് പാസിനായി അധിക പണം നല്‍കേണ്ടിവന്നു. 200 മുതല്‍ 300 ദിര്‍ഹം വരെയാണ് ഈടാക്കിയത്. സന്ദര്‍ശക വിസകള്‍ക്ക് വിസാ കാലാവധി അവസാനിക്കുന്ന തീയ്യതി മുതല്‍ സാധാരണ 10 ദിവസമാണ് ഗ്രേസ് പീരിഡ് ലഭിക്കുക. ഔട്ട് പാസ് വാങ്ങുന്ന സന്ദര്‍ശകര്‍ രാജ്യം വിട്ടിരിക്കണമെന്നും വ്യവസ്ഥയുണ്ട്. അല്ലാത്തപക്ഷം ഇവര്‍ക്ക് താമസ വിസയ്ക്ക് ഉള്‍പ്പെടെയുള്ള അപേക്ഷകള്‍ നല്‍കാന്‍ സാധിക്കില്ലെന്നും മുന്നറിയിപ്പുണ്ട്.
