ദുബായ്-ഷാർജ ജലഗതാഗത സർവീസുകൾ ഓഗസ്റ്റ് നാല് മുതൽ പുനരാരംഭിക്കുമെന്ന് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി(ആർടിഎ) അറിയിച്ചു. ദുബായ് ഫെറി വഴിയുള്ള സമുദ്ര ഗതാഗത ലെയ്നിന്റെ പ്രവർത്തനമാണ് വീണ്ടും ആരംഭിക്കുന്നതെന്നും ആർടിഎ അറിയിച്ചു.
തിങ്കൾ മുതൽ വ്യാഴം വരെ പ്രതിദിനം എട്ട് യാത്രകളാണ് നടത്തുക. വാരാന്ത്യ അവധി ദിവസങ്ങളായ വെള്ളി മുതൽ ഞായർ വരെ ആറ് യാത്രകളും ഉണ്ടാവും. ദുബായിയെ ഇതര എമിറേറ്റുകളുമായി ബന്ധിക്കുന്ന ആദ്യത്തെ മറൈൻ സർവീസാണിതെന്ന പ്രത്യേകത കൂടിയുണ്ട്. ദുബായിലെ അൽ ഗുബൈബ സ്റ്റേഷനും ഷാർജ അക്വേറിയം മറൈൻ സ്റ്റേഷനുമിടയിലാണ് ഈ സർവീസ് നടക്കുന്നത്. ദുബായ്-ഷാർജ യാത്രാ പ്രശ്നം പരിഹരിക്കുക എന്ന ലക്ഷ്യത്തിലാണ് ഈ സർവീസ് ആരംഭിച്ചതെന്നും അധികൃതർ കൂട്ടിച്ചേർത്തു.
അൽ ഗുബൈബ സ്റ്റേഷനും ഷാർജ അക്വേറിയം മറൈൻ സ്റ്റേഷനുമിടയിലെ യാത്രയ്ക്ക് 35 മിനിറ്റാണ് ദൈർഘ്യമുള്ളത്. പ്രവൃത്തി ദിവസങ്ങളിൽ രാവിലെ രണ്ട് സർവീസുകളാണ് ഉണ്ടാവുക. ഷാർജയിൽ നിന്ന് രാവിലെ ഏഴ് മണിക്കും 8.30നും ദുബായിൽ നിന്ന് 7.45നുമാണ് സർവീസ് ആരംഭിക്കുക. വൈകിട്ട് 4.45നും 6.15നും ഷാർജയിൽ നിന്ന് രണ്ട് സർവീസുകൾ കൂടി ഉണ്ടാവും.
ദുബായിൽ നിന്ന് വൈകിട്ട് നാല് മണിക്കും, 5.30 നും, 7 മണിക്കുമായി മൂന്ന് സർവീസുകൾ ഉണ്ടാവും. വാരാന്ത്യ ദിനങ്ങളായ വെള്ളി മുതല്‍ ഞായർ വരെ ആറ് യാത്രകൾ ആണ് ഉള്ളത്. ഉച്ചയ്ക്ക് രണ്ട്മണിക്കും വൈകിട്ട് നാല് മണിക്കും, ആറ് മണിക്കും സമയങ്ങളിൽ ഷാർജയിൽ നിന്ന് യാത്ര പുറപ്പെടും. കൂടാതെ ദുബായിൽ നിന്ന് വൈകിട്ട് മൂന്ന് മണിക്കും, അഞ്ചു മണിക്കും, എട്ട് മണിക്കുമാണ് സർവീസ്. ഒരു യാത്രയ്ക്ക് സില്‍വർ ക്ലാസിന് 15 ദിർഹമാണ് ടിക്കറ്റ് നിരക്ക് ഈടാക്കുന്നത്. ഗോൾഡ് ക്ലാസ്സിന് 25 ദിർഹവുമാണ് നിരക്ക്. ശാരീരിക വൈകല്യമുള്ളവർക്കും അഞ്ച് വയസ്സിന് താഴെയുള്ളവർക്കും യാത്ര സൗജന്യമായിരിക്കും. നോൽ കാർഡ് വഴിയും ഓൺലൈനായും ടിക്കറ്റ് ബുക്ക് ചെയ്യാനുള്ള വെബ്സൈറ്റ് https://marine.rta.ae.
