ദുബായ് ഏറെ പ്രതീക്ഷയോടെ കാത്തിരിക്കുന്ന മെട്രോ ബ്ലൂ ലൈൻ പദ്ധതി 2029 സെപ്റ്റംബർ 9ന് പ്രവർത്തനം ആരംഭിക്കുമെന്ന് റോഡ്‌സ് ആന്റ് ട്രാൻസ്പോർട്ട് അതോറിറ്റി (ആർടിഎ) അറിയിച്ചു. പദ്ധതിയുടെ നിർമ്മാണത്തിനായി മൂന്ന് പ്രമുഖ തുർക്കി, ചൈനീസ് കമ്പനികളായ മാപ്പ, ലിമാക്, സിആർആർസി എന്നിവയ്ക്ക് 20.5 ബില്യൺ ദിർഹത്തിൻ്റെ കരാരാണ് ട്രാൻസ്പോർട്ട് അതോറിറ്റി നൽകിയിരിക്കുന്നത്.
ദുബായ് മെട്രോയുടെ ചരിത്രത്തിലെ പ്രധാനപ്പെട്ട വർഷമാണ് 2009 സെപ്റ്റംബർ 9. കാരണം 2009 സെപ്റ്റംബർ 9ന് രാത്രി 9 മണിക്ക് കൃത്യം 9-ാം മിനിറ്റിലെ 9-ാം സെക്കൻഡിലാണ് ദുബായ് മെട്രോ തുറന്നത്. ദുബായ് മെട്രോയുടെ 20-ാം വാർഷികത്തോടനുബന്ധിച്ചാണ് ബ്ലൂ ലൈനിൻ്റെ റോളൗട്ട്. ഇതേ തിയതി കുറിച്ചുകൊണ്ടാണ് മെട്രോ ബ്ലൂ ലൈൻ പദ്ധതിയും പ്രവർത്തനം ആരംഭിക്കുക.
14 സ്റ്റേഷനുകൾ ഉൾപ്പെടെ 30 കിലോമീറ്റർ ദൈർഘ്യമുള്ള പദ്ധതിയിൽ 28 ട്രെയിനുകൾ സവാരി നടത്തും. 2030-ൽ 2,00,000 യാത്രക്കാർ സഞ്ചരിക്കുമെന്നും 2040-ഓടെ 3,20,000 യാത്രക്കാരായി ഉയരുമെന്നുമാണ് വിലയിരുത്തൽ. ഗതാഗത ശൃംഖല ഇരുദിശകളിലുമായി മണിക്കൂറിൽ 46,000 യാത്രക്കാരെ വഹിക്കും.
