ആകാശത്ത് ദൃശ്യവിരുന്നൊരുക്കി 12ന് ഉൽക്കമഴ ദൃശ്യമാകും. വർഷം തോറും പെയ്തിറങ്ങുന്ന പെഴ്സീയിഡ്സ് ഉൽക്കകൾ 12ന് അർധരാത്രി മുതൽ പുലർച്ചെ 3വരെ ചന്ദ്രവെളിച്ചമില്ലാത്ത ആകാശത്ത് കൂടുതൽ ശോഭയോടെ ദൃശ്യമാകും. മണിക്കൂറിൽ 50 മുതൽ 100 ഉൽക്കകൾ വരെയാണ് ആകാശത്ത് മിന്നിമറയുക. ഉൽക്ക വർഷം കാണാൻ വിപുലമായ സൗകര്യം ഒരുക്കിയതായി ഷാർജ മെലീഹ അർക്കിയോളജിക്കൽ സെന്റർ അറിയിച്ചു.
വർഷത്തിലെ ദീർഘവും വ്യക്തവുമായ ഉൽക്ക വർഷമാണ് 12ന് ദൃശ്യമാകുക. ഭൂമിയിൽ എല്ലായിടത്തും ഉൽക്കവർഷം ദൃശ്യമാകുമെന്നാണ് പ്രതീക്ഷിക്കുന്നത്. മെലീഹ ക്യാംപ് സൈറ്റിൽ വൈകുന്നേരം 6 മുതൽ ഉൽക്ക കാഴ്ചകൾ കാണുന്നതിനുള്ള തയാറെടുപ്പുകൾ ആരംഭിക്കും. മരുഭൂമിയുടെ നടുവിൽ ഏറ്റവും അനുയോജ്യമായ പ്രദേശമാണ് ആകാശ പഠനത്തിനായി തയാറാക്കിയിരിക്കുന്നത്. സന്ദർശകർക്ക് ദൂരദർശിനിയിലൂടെ ഉൽക്ക വർഷം കാണുന്നതിനുള്ള സംവിധാനവും ഇവിടെ സജ്ജീകരിക്കും. ഉൽക്ക മഴയെക്കുറിച്ച് കൂടുതൽ അറിവ് പകരുന്ന പരിപാടികളും ഇതിന്റെ ഭാഗമായി സംഘടിപ്പിക്കും.
ഉൽക്ക മഴ കാണുന്നതിനുള്ള സ്ഥലത്തേക്കുള്ള പ്രവേശനം തിരക്ക് പരിഗണിച്ച് ടിക്കറ്റ് മൂലം നിയന്ത്രിച്ചിട്ടുണ്ട്. സ്റ്റാൻഡേർഡ്, പ്രീമിയം ക്ലാസുകളിൽ ടിക്കറ്റ് തിരഞ്ഞെടുക്കാം. കുടുംബത്തോടൊപ്പം എത്തുന്നവർക്ക് ടിക്കറ്റ് നിരക്കിൽ പ്രത്യേക ഇളവും ഏർപ്പെടുത്തും. താത്പര്യമുള്ളവർക്ക് https://discovershurooq.ae എന്ന വെബ്സൈറ്റിലൂടെ ടിക്കറ്റ് ബുക്ക് ചെയ്യാം. കൂടുതൽ വിവരങ്ങൾക്ക് ഫോൺ +971 6802 1111 എന്ന നമ്പറുമായും ബന്ധപ്പെടാൻ സാധിക്കും.
