ശക്തമായ മഴയേത്തുടർന്നുണ്ടായ പ്രളയത്തിന്റെ കെടുതിയിൽ നിന്ന് യുഎഇ പൂർണമായും മുക്തമായിട്ടില്ല. ഇതിനിടെ ദുബായിലേയ്ക്കുള്ള യാത്രക്കാർക്ക് മുന്നറിയിപ്പുമായി എത്തിയിരിക്കുകയാണ് അബുദാബി ഇന്ത്യൻ എംബസി. ദുബായിലേയ്ക്കുള്ള അത്യാവശ്യമല്ലാത്ത യാത്രകൾ മാറ്റിവെക്കണമെന്നാണ് എംബസി അധികൃതർ വ്യക്തമാക്കിയത്.
ദുബായ് ഇൻ്റർനാഷണൽ എയർപോർട്ടിലേക്ക് യാത്ര ചെയ്യുന്നതോ അതുവഴി പോകുന്നതോ ആയ യാത്രക്കാർക്കാണ് മുന്നറിയിപ്പ് നൽകിയിരിക്കുന്നത്. പ്രളയത്തേത്തുടർന്ന് ദുബായ് ഇൻ്റർനാഷണൽ എയർപോർട്ടിലേയ്ക്കുള്ള ഫ്ലൈറ്റുകളുടെ എണ്ണവും പരിമിതപ്പെടുത്തിയിട്ടുണ്ട്. എന്നാൽ നിലവിൽ സർവ്വീസ് നടത്തുന്ന ഫ്ളൈറ്റുകളിൽ യാത്ര ചെയ്യുന്നവർക്ക് യാത്ര പുറപ്പെടുന്നതിനും എത്തിച്ചേരുന്നതിനും കാലതാമസം നേരിടാൻ സാധ്യതയുണ്ടെന്നും അധികൃതർ അറിയിച്ചു.
ദുബായ് വിമാനത്താവളത്തിലെത്തുന്ന ഇന്ത്യൻ പൗരന്മാർക്ക് സഹായങ്ങൾ നൽകുന്നതിനായി ദുബായിലെ കോൺസുലേറ്റ് ജനറൽ ഓഫ് ഇന്ത്യ ഹെൽപ്പ് ലൈൻ നമ്പറുകളും നൽകിയിട്ടുണ്ട്. സേവനം ആവശ്യമുള്ളവർക്ക് 971501205172, 971569950590, 971507347676, 971585754213 എന്ന മുഴുവൻ സമയവും പ്രവർത്തിക്കുന്ന ഹെൽപ്പ്‌ലൈൻ നമ്പറുകളിൽ ബന്ധപ്പെടാനും സാധിക്കും.
