യുഎഇയുടെ വിവിധ ഭാഗങ്ങളിൽ ഇന്ന് പുലർച്ചെ മുതൽ ശക്തമായ മൂടൽമഞ്ഞാണ് അനുഭവപ്പെടുന്നത്. ഇതിനേത്തുടർന്ന് നാഷണൽ സെൻ്റർ ഓഫ് മെറ്റീരിയോളജി (എൻസിഎം) അധികൃതർ ഇന്നും രാജ്യത്ത് റെഡ് അലർട്ട് പ്രഖ്യാപിച്ചു. മൂടൽമഞ്ഞ് രൂക്ഷമായതിനാൽ വാഹനയാത്രക്കാൻ അതീവ ജാഗ്രത പാലിക്കണമെന്നും അധികൃതർ നിർദേശിച്ചു.
റോഡിലെ ദൃശ്യപരത കുറവായതിനാൽ വാഹനമോടിക്കുന്നവർ വേഗത കുറയ്ക്കണമെന്നും സുരക്ഷാ മാർഗനിർദേശങ്ങൾ പാലിക്കണമെന്നും ദുബായ് പൊലീസും നിർദേശിച്ചു. അതോടൊപ്പം ഡ്രൈവർമാർ വാഹനത്തിൽ ഹസാർഡ് ലൈറ്റുകൾ ഉപയോഗിക്കണമെന്നും നിർദേശമുണ്ട്.
അതേസമയം, യുഎഇയിൽ ഇന്ന് നല്ല കാലാവസ്ഥ പ്രതീക്ഷിക്കാമെങ്കിലും ചില സ്ഥലങ്ങളിൽ ഇന്ന് താപനില വർധിക്കാൻ സാധ്യതയുണ്ടെന്നാണ് വിലയിരുത്തൽ. അബുദാബിയിൽ ഇന്ന് താപനില 43 ഡിഗ്രി സെൽഷ്യസും ദുബായിൽ 44 ഡിഗ്രി സെൽഷ്യസും വരെ ഉയരുമെന്നാണ് കാലാവസ്ഥാ വകുപ്പ് അറിയിച്ചത്.
