ഖത്തര്‍ അമീര്‍ ശൈഖ് തമീം ബിന്‍ ഹമജ് അല്‍ഥാനിയുടെ പത്നി ശൈഖ ജവാഹിര്‍ ബിന്‍ത് ഹമദ് ബിന്‍ സുഹൈം അല്‍ഥാനി ആദ്യമായി ഔദ്യോഗിക പരിപാടികളില്‍ പ്രത്യക്ഷപ്പെട്ട ചിത്രങ്ങൾ പുറത്ത്. ഖത്തര്‍ അമീറിന്റെ സ്പെയിന്‍ സന്ദര്‍ശനത്തിനിടെയാണ് ശൈഖ ജവാഹിര്‍ ബിന്‍ത് ഹമദിന്‍റെ ചിത്രങ്ങളും പുറത്തുവന്നത്. സ്പെയിനിന്‍റെ തലസ്ഥാന നഗരമായ മാഡ്രിഡില്‍ സര്‍ലുവേല കൊട്ടാരത്തില്‍ സ്പാനിഷ് രാജാവ് ഫിലിപ്പ് ആറാമനും രാജ്ഞി ലെറ്റിസിയക്കും ഒപ്പമുളള ഗ്രൂപ്പ് ഫോട്ടോയിലാണ് ഖത്തര്‍ അമീറിന്റെ പത്നിയും ഇടം പിടിച്ചത്.
യൂറോപ്യന്‍ സന്ദര്‍ശനത്തിനിടെ സ്പെയിനിലെത്തിയ ഖത്തര്‍ അമീറിന് പരമ്പരാഗത രീതിയിലാണ് സ്വീകരണം ഒരുക്കിയത്. സൈനിക പരേഡും ഏര്‍പ്പെടുത്തിയിരുന്നു. സ്പാനിഷ് പ്രധാനമന്ത്രി പെഡ്രോ സാന്‍ചസുമായും ഖത്തര്‍ അമീര്‍ കൂടിക്കാ‍ഴ്ച നടത്തി. സ്വീകരണത്തിന്‍റേയും തുടര്‍ന്നുളള ഔദ്യോഗിക ചടങ്ങുകളുടേയും ചിത്രങ്ങളാണ് പുറത്തുവന്നത്. മുന്‍ ഖത്തര്‍ അമീര്‍ ശൈഖ് ഖലീഫ ബിന്‍ ഹമദ് അല്‍ഥാനിയുടെ പേരമകൾ കൂടിയാണ് ശൈഖ ജവാഹിര്‍. 2005ലാണ് ശൈഖ് തമീം ശൈഖ ജവാഹിര്‍ വിവാഹം.
അതേസമയം ഖത്തറും സ്പെയിനും തമ്മില്‍ നിരവധി കരാറുകളില്‍ ഏര്‍പ്പെടാനും ധാരണായായി. നയതന്ത്ര, സാമ്പത്തീക, വ്യാപാര, കായിക, സാംസ്കാരിക മേഖലകളില്‍ സഹകരണം ശക്തിപ്പെടുത്താനാണ് തീരുമാനം.
