മലയാളിയുടെ പ്രവാസത്തിൻ്റ സമവാക്യങ്ങൾ മാറ്റിയെഴുതിയ വർഷമാണ് 2023. ഗൾഫ് പ്രവാസം എന്നത് യൂറോപ്പ് കുടിയേറ്റമെന്ന നിലയിലേക്ക് മാറുന്ന കാലം. കുടിയേറ്റ നിരക്ക് വർദ്ധിച്ചത് കേരളത്തെ അങ്കലാപ്പിലാക്കുന്നതിനൊപ്പം പ്രവാസലോകത്തെ നിയമമാറ്റങ്ങളും സാഹചര്യങ്ങളും 2023നെ വേറിട്ടുനിർത്തുന്നു. കേരളത്തിലെ യുവത്വം കൂട്ടത്തോടെ നാടുവിടുന്നെന്ന ആവലാതികൾ ഉയർന്നുകേട്ട വർഷം കൂടിയാണ് 2023.
പ്രവാസം കുടിയേറ്റമായി മാറിയ കാലം
നഴ്സുമാരെ ആശ്രിയിച്ച് മുന്നേറിയ മലയാളി കുടിയേറ്റം കോവിഡിന് ശേഷം ഗൾഫിൽ നിന്ന് യൂറോപ്പിലേക്ക് മാറിയത് വളരെ വേഗമാണ്. ഓസ്ട്രേലിയയും കാനഡയുമാണ് പ്രധാന ഇടങ്ങളായത്. മാൾട്ടപൊലുളള ചെറുരാജ്യങ്ങളും പ്രവാസികളെ ആകർഷിച്ചു. എങ്കിലും യുഎഇ ഉൾപ്പടെ ഗൾഫ് പ്രവാസികളുടെ സജീവത പ്രകടമാക്കി.
പുതിയ കാലത്തിനനുസരിച്ചുളള തൊഴിൽ മേഖല തേടാൻ യുവാക്കളെ പ്രേരിപ്പിച്ച വർഷം കൂടിയാണ് കടന്നുപോകുന്നത്. മത്സരാധിഷ്ഠിത തൊഴിലും തൊഴിലവസരങ്ങളും ഉണ്ടായെങ്കിലും സമാന്തരമായി തൊഴിൽ അസ്ഥിരതയുമുണ്ടായി. സൌദിയും യുഎഇയും കുവൈറ്റും സ്വദേശിവ്തകരണം ശക്തമാക്കുന്നത് ഗൾഫിലെ കാഴ്ചകളായി മാറി. ആശ്രിത കുടുംബ വിസ നിയന്ത്രണം നടപ്പിലാക്കിയ കുവൈറ്റ് ഇളവുകളിലേക്ക് വർഷാവസാനവും എത്തിയിട്ടില്ല. ഇതിനിടെ ഡോളറിൻ്റെ വിനിമയമൂല്യം രൂപയുമായ ബന്ധപ്പെട്ട് റെക്കോർഡ് താഴ്ചയിലെത്തിയത് ലോകമാകമാനമുളള പ്രവാസികൾ പ്രയോജനപ്പെടുത്തിയ വർഷം കൂടിയായിരുന്നു 2023.
കപ്പലോളം പ്രതീക്ഷകൾ
പ്രവാസികളെ സാരമായി ബാധിക്കുന്ന വിമാനടിക്കറ്റ് നിരക്കിൽ ഇടപെടാൻ കഴിയില്ലെന്ന കേന്ദ്ര സർക്കാറിൻ്റെ നിലപാടാണ് ഇക്കൊല്ലം ഏറ്റവും നിരാശജനകമായി മാറിയത്. ഉത്സവ സീസണുകളിലും മറ്റും വിമാനക്കമ്പനികൾ പ്രവാസികളെ ചൂഷണം ചെയ്യുന്നതിനെതിരേ കാലങ്ങളായി വലിയ പ്രതിഷേധം ഉയർന്നിരുന്നു. അമിത യാത്രാനിരക്ക് നിയന്ത്രിക്കണമെന്നും ചാർട്ടേർഡ് ഫ്ളൈറ്റുകൾ ഓപ്പറേറ്റ് ചെയ്യാൻ അനുവദിക്കണമെന്നും ആവശ്യപ്പെട്ട് കേരളം കേന്ദ്രത്തെ സമീപിച്ചിരുന്നെങ്കിലും അനുകൂല നിലപാട് ലഭ്യമായില്ല.
അതേസമയം ഗൾഫ് മേഖലയിൽനിന്ന് കേരളത്തിലേക്ക് യാത്രാകപ്പൽ സർവ്വീസ് ആരംഭിക്കുന്നതിന് കേന്ദ്രം അംഗീകാരം നൽകിയ വർഷം കൂടിയാണ് 2023. പതിനായിരം രൂപയ്ക്ക് 200 കിലോ ലഗേജ് ഉൾപ്പടെ യാത്ര ചെയ്യാനാകുമെന്നാണ് നിഗമനം. വിമാന യാത്രയേക്കാൾ ചിലവേറെ കുറയുമെന്നതിനാൽ കപ്പൽ യാത്രാ സൌകര്യം പുതുവർഷത്തിലെ പ്രവാസികളുടെ പ്രതീക്ഷയാണ്. ദുബായിൽ നിന്ന് കൊച്ചി, ബേപ്പൂർ തുറമുഖങ്ങളിലേക്കാണ് ആദ്യഘട്ട സർവ്വീസുകൾ ആസൂത്രണം ചെയ്യുന്നത്.
പ്രവാസികൾക്ക് വോട്ടവകാശം വേണമെന്ന ആവശ്യവും കാലങ്ങളായി ഉയരുന്നതാണ്. 2024ലെ ലോക്സഭാ തെരഞ്ഞെടുപ്പിൽ പ്രവാസികൾക്ക് വോട്ടവകാശം നൽകുന്നത് സംബന്ധിച്ച ചർച്ചകൾ പുരോഗമിക്കുന്നതും പ്രവാസലോകത്തെ പ്രതീക്ഷയാണ്. പ്രവാസികൾക്കും, കുടിയേറ്റ തൊഴിലാളികൾക്കും വോട്ടവകാശം ഒരുക്കാമെന്ന നിലപാടാണ് കേന്ദ്രം സുപ്രീംകോടതിയിൽ സ്വീകരിച്ചിട്ടുളളതും. ഇതിനായി ജനപ്രാധിനിധ്യ നിമയത്തിലെ ഭേതഗതികൾ സംബന്ധിച്ച കേന്ദ്രനീക്കം തന്നെയാകും നിർണായകമാവുക.
നയവും നയതന്ത്രവും
2023 സെപ്റ്റംബറിലാണ് ഖലിസ്ഥാൻ വിഘടനവാദം കാനഡയിലെ ഇന്ത്യൻ പ്രവാസികളെ പ്രതിസന്ധിയിലാക്കിയത്. ഖലിസ്ഥാൻ വിഘടനവാദി നേതാവായ ഹർദ്ദീപ് സിംഗ് നിജ്ജാറിൻ്റെ കൊലപാതകത്തോടെയാണ് പ്രശ്നങ്ങൾക്ക് തുടക്കം. ഇന്ത്യ- കാനഡ നയതന്ത്ര ബന്ധം വഷളാവുന്നതിനിടെ മറ്റൊരു ഖലിസ്ഥാൻവാദി നേതാവ് സുഖ്‌ദൂൽ സിങ് എന്ന സുഖ ദുൻകെ കൊല്ലപ്പെട്ടതും സ്ഥിതി രൂക്ഷമാക്കി. എന്നാൽ അന്താരാഷ്ട്ര സമൂഹത്തിൻ്റെ ഇടപെടലോടെ സ്ഥിതിഗതികൾ താത്കാലിക നിയന്ത്രണത്തിലെത്തിച്ചെങ്കിലും ഇരുരാജ്യങ്ങളും തമ്മിലുളള സൌഹൃദത്തിൽ വിളളൽവീണു.
ബ്രിട്ടൻ കുടിയേറ്റ നിയമങ്ങൾ കർശനമാക്കിയതും പ്രവാസലോകത്തെ വലിയ ചർച്ചയായി. രാജ്യത്ത് ഏഴരലക്ഷം കുടിയേറ്റക്കാരുണ്ടെന്നും എണ്ണം പകുതിയായി കുറയ്ക്കുകയാണ് പദ്ധതിയെന്നും ബ്രിട്ടൻ പ്രഖ്യാപിച്ചത് പഠനവിസയിലും തൊഴിൽ വിസയിലും യുകെ ലക്ഷ്യമിടുന്നവരെ നിരാശപ്പെടുത്തി. വിദ്യാര്‍ത്ഥി വിസയില്‍ യുകെയില്‍ എത്തുന്നവര്‍ക്ക് കുടുംബാംഗങ്ങളെ കൊണ്ടുവരുന്നതിന് കര്‍ശന നിയന്ത്രണം ഏർപ്പെടുത്തിയതും ഹെൽത്ത് ആൻഡ് കെയർ വർക്കേഴ്സിന് ആശ്രതവിസ നിർത്തലാക്കിയതും പ്രധാന മാറ്റമാണ്. 2024 ഏപ്രിൽ മുതലാണ് നിയമം യുകെയിൽ പ്രാബല്യത്തിൽ വരിക.
യുകെ വിസ ലഭിക്കാനുള്ള കുറഞ്ഞ വാർഷിക ശമ്പളം 26,200 പൗണ്ടിൽ നിന്നും 38,700 പൗണ്ടായി ഉയർത്തിയതും പ്രവാസികളുടെ സ്വപ്നങ്ങളിൽ കരിനിഴൽ വീഴ്ത്തി. ബ്രിട്ടന് പിന്നാലെ കുടിയേറ്റ ഭീഷണിയെ ചെറുക്കാൻ ഓസ്ട്രേലിയയും നിയമ പരിഷ്കരണം നടത്താനുറച്ചത് 2023ലാണ്. വിസാചട്ടങ്ങള്‍ പുനക്രമീകരിക്കുന്നതോടെ ഓസ്ട്രേലിയയിലേക്കുളള കുടിയേറ്റം രണ്ട് വർഷത്തിനുളളിൽ പകുതിയായി കുറയുമെന്നാണ് നിഗമനം.
സർക്കാരിൻ്റെ പ്രവാസിമിത്രം
പ്രവാസികൾക്കായി കേരള സർക്കാർ മെയ് 17ന് ഉദ്ഘാടനം ചെയ്ത സംരംഭമാണ് പ്രവാസിമിത്രം പോർട്ടൽ. ലോകത്തെവിടെ നിന്നും പ്രവാസികൾക്ക് കേരളത്തിലെ റവന്യു, സർവേ സേവനങ്ങൾ പൂർത്തിയാക്കാൻ സാധിക്കുന്നതാണ് പ്രവാസി മിത്രം പോർട്ടൽ. യുഎഇയിലെ പ്രവാസി മലയാളികൾക്ക് ആരോഗ്യ മേഖലയുമായി ബന്ധപ്പെട്ട ഉപദേശങ്ങൾ സൗജന്യമായി ലഭ്യമാക്കുന്ന പദ്ധതിയുമായി നടൻ മമ്മൂട്ടി രംഗത്തെത്തിയതും ഈ വർഷം. താരത്തിന്റെ കെയർ ആൻഡ് ഷെയർ ഇൻ്റർനാഷണൽ ഫൗണ്ടേഷൻ വഴിയാണ് പദ്ധതി നടപ്പിലാക്കുക.
മിഡിൽ ഈസ്റ്റിലെ ഏറ്റവും സ്വാധീനമുള്ള ഇന്ത്യക്കാരൻ ആരാണെന്നചോദ്യത്തിന് ഉത്തരം ഒന്നേയുളളു. ലുലു ഗ്രൂപ്പ് ചെയര്‍മാനും വ്യവസായിയുമായ എം.എ.യൂസഫലി ആണെന്ന് പ്രമുഖ വാണിജ്യ മാഗസിനായ അറേബ്യൻ ബിസിനസ് മാഗസിൻ്റെ റിപ്പോർട്ട് 2023 മാർച്ചിലാണ് പുറത്തെത്തിയത്. സാമൂഹിക സാംസ്കാരിക പ്രവാസ മേഖലയിൽ യൂസഫലിയുടെ നിരന്തര ഇടപെടൽ കണ്ട വർഷം കൂടിയായിരുന്നു ഇത്. ഇതിനിടെ എംഎ യൂസഫലി മമ്മൂട്ടിയേയും മോഹൻലാലിനേയും ലണ്ടനിൽ കണ്ടുമുട്ടിയ ഫോട്ടോകളും ചിത്രങ്ങളും സോഷ്യല്‍ മീഡിയ വൈറലായിമാറി.
പ്രവാസലോകത്തെ പ്രാർത്ഥന
2017 മുതൽ യെമനിൽ തടവിൽ കഴിയുന്ന നിമിഷ പ്രിയ പ്രവാസ ലോകത്തെ നൊമ്പരമാണ്. നിമിഷ പ്രിയയുടെ മോചനത്തിനായി പ്രവാസി സംഘടകളും കേരളസർക്കാരും കേന്ദ്രവും നിരന്തര ഇടപെടലുകളാണ് നടത്തുന്നത്. യെമനിൽ വധശിക്ഷയ്ക്കു വിധിക്കപ്പെട്ട നിമിഷപ്രിയയുടെ അമ്മ പ്രേമകുമാരിക്ക് മകളെ സന്ദർശിക്കാൻ ദില്ലി ഹൈക്കോടതി അനുമതി നൽകിയതാണ് സംഭവവുമായി ബന്ധപ്പെട്ടുണ്ടായ പുരോഗതി. പ്രവാസലോകത്ത് മലയാളികളുടെ ജീവനപഹരിച്ച നിരവധി അപകടങ്ങളും അത്യാഹിതങ്ങളും സംഭവിച്ച വർഷം കൂടിയാണ് കടന്നുപോകുന്നത്.
തൊഴിലില്ലായ്മയും വിലക്കയറ്റവും മുതൽ രാഷ്ട്രീയ അരാജകത്വവും ആധുനികതയെ പുൽകാനുളള വെമ്പലും ഉൾപ്പെടെ നിരവധി കാരണങ്ങളാണ് യുവാക്കളെ പ്രവാസത്തിലേക്ക് എത്തിച്ചത്. എങ്കിലും, ഇന്നലെകളേക്കാൾ നാളെകളിലേക്ക് പ്രതീക്ഷ അർപ്പിച്ചാണ് പ്രവാസികളുടെ ജീവിതം. പുതിയ വഴികളും അവസരങ്ങളും തുറന്നുകിട്ടുന്ന നല്ല ദിവസങ്ങളെ കാത്തിരിക്കുന്നവരാണ് ഏവരും. 2024നെ വരവേൽക്കുന്നതിനൊപ്പം സങ്കടങ്ങളേയും പരിഭവങ്ങളേയും കഠിനാധ്വാനം കൊണ്ട് മാറ്റിഴെഴുതാനുളള ശ്രമത്തിലാണവർ. പ്രവാസലോകത്ത് കൈവരുന്ന ഭാഗ്യം നാട്ടിലെ ചിരിയും സന്തോഷവുമായി മാറുമെന്ന് അവർക്ക് നന്നായി അറിയാം.
