ഒമാനിൽ ഓടകളിൽ നിന്നും മറ്റും ഒഴുകിയെത്തുന്ന മലിനജലത്തിൽ നിന്ന് ബയോഗ്യാസ് നിർമിക്കാനുള്ള പദ്ധതിയുമായി നാമാ വാട്ടർ. വിഷൻ 2040ന്‍റെ ഭാഗമായി രാജ്യത്തിന് സാമ്പത്തിക വളർച്ചയുണ്ടാക്കുക എന്ന ലക്ഷ്യത്തോടെയാണ്ഈ പദ്ധതി നടപ്പിലാക്കുന്നത്. മലിനജലത്തിൽ നിന്നുള്ള നിരവധി പദ്ധതികളും നിലവിലുണ്ട്.
ഒമാൻ മുനിസിപ്പാലിറ്റിയുടെ മലിന ജലത്തിൽ നിന്ന് വൈദ്യുതി ഉൽപാദിപ്പിക്കുക, ജൈവ മാലിന്യ വൈദ്യുത പദ്ധതി ഉപയോഗിച്ച് ഭക്ഷ്യ ഉൽപന്നങ്ങളിൽ നിന്നു ഇന്ധനം ഉൽപാദിപ്പിക്കുക, കാർഷിക എണ്ണകളിൽ നിന്നു ഏവിയേഷൻ എണ്ണ ഉൽപാദിപ്പിക്കുക എന്നിവ ഈ പദ്ധതികളിൽ ഉൾപ്പെടും. ബയോഗ്യാസ് നിർമാണത്തിന് നിരവധി ഘട്ടങ്ങളുണ്ട്. ഓക്സിജൻ ഇല്ലാതെ ബയോ മെറ്റീരിയൽ വേർതിരിക്കണമെന്നും അധികൃതർ പറഞ്ഞു.
ഗ്രീൻ ഏവിയേഷൻ എണ്ണ ഉൽപാദനംവരെ ഉണ്ടാക്കാനുള്ള കഴിവ് ഈ പദ്ധതിയിലൂടെ ഉണ്ടാവും. കൂടാതെ കാർബൺഡയോക്സൈഡിന്‍റെ അംശം കുറഞ്ഞ ഏവിയേഷൻ ഇന്ധനവും ഇതിലുൾപ്പെടും. എന്നാൽ പദ്ധതി വളരെ ചിലവ് കൂടിയതാണെങ്കിലും മലിനജലവുമായി ബന്ധപ്പെട്ട ആരോഗ്യ പരിസ്ഥിതി പ്രശ്നങ്ങൾ പരിഹരിക്കാൻ സഹായിക്കുമെന്ന് സിവിൽ ഏവിയേഷൻ അതോറിറ്റി പറഞ്ഞു. പദ്ധതികൾ നടപ്പാക്കാനുള്ള സാധ്യതാപഠനമാണ് നാമാ വാട്ടർ ഇപ്പോൾ നടത്തിക്കൊണ്ടിരിക്കുന്നത്.
ബയോഗ്യാസും ബയോ എണ്ണകളും ഉൽപാദിപ്പിക്കാനുള്ള ഇത്തരം നീക്കങ്ങൾ നാമാ വാട്ടറിന് വരുമാനം വർധിപ്പിക്കാൻ സഹായകമാവും. നിലവിൽ മാലിന്യത്തിൽ നിന്ന് ശുദ്ധീകരിച്ചെടുത്ത ജലവും ശുദ്ധീകരിച്ച മാലിന്യത്തിൽനിന്നുള്ള വളവും നാമക്ക് വരുമാനം ഉണ്ടാക്കുന്നുണ്ട്. നിലവിൽ ഒമാനിൽ സലാല ഒഴികെ 60 മലിനജല ശുദ്ധീകരണ പ്ലാന്റുകളാണ് നാമക്കുള്ളത്. ദിവസവും മലിന ജലത്തിൽനിന്ന് 30,0000 ഘന മീറ്റർ ജലമാണ് ഈ പ്ലാന്റുകളിൽ നിന്നും ഉൽപാദിപ്പിക്കുന്നത്.
