ഒമാനിലെ ടാക്സി ഡ്രൈവർമാർക്ക് പുതിയ മാർഗ നിർദേശവുമായി ഗതാഗത, വാർത്തവിനിമയ, ഇൻഫർമേഷൻ ടെക്നോളജി മന്ത്രാലയം. 2016ലെ രാജകീയ ഉത്തരവിന്‍റെ അടിസ്ഥാനത്തിലാണ് പുതിയ മാർഗ നിർദേശങ്ങൾ പുറത്ത് വിട്ടിരിക്കുന്നത്. ഇതനുസരിച്ച് ഡ്രൈവിങ് ലൈസൻസ് കിട്ടി മൂന്ന് വർഷം പൂർത്തിയായ ശേഷം മാത്രമായിരിക്കും ഇനി ടാക്സി ഓടിക്കാൻ സാധിക്കുള്ളു. കൂടാതെ സ്വകാര്യ മേഖലയിൽ ജോലി ചെയ്യുന്ന 600 റിയാലിൽ താഴെ മാസ വരുമാനമുള്ളവർക്ക് മാത്രമേ പാർട്ട് ടൈമായി ടാക്സി ഓടിക്കാൻ കഴിയൂ. ടാക്സി ഓടിക്കുന്നതിനുള്ള കുറഞ്ഞ പ്രായം 21 വയസ്സും കൂടിയ പ്രായം 60ഉം ആണ്.
അതേസമയം ആധികാരികമായ മെഡിക്കൽ സ്ഥാപനങ്ങളിൽ നിന്ന് ടാക്സി ഓടിക്കാൻ ആരോഗ്യം അനുവദിക്കുമെന്ന മെഡിക്കൽ സർട്ടിഫിക്കറ്റ് ഹാജരാക്കുന്നവർക്ക് 60 വയസ്സിന് ശേഷം ഒരു വർഷം കൂടി അധികമായി നൽകും. കൂടാതെ തുറമുഖം, വിമാനത്താവളം, ഹോട്ടലുകൾ എന്നിവിടങ്ങളിൽ സർവിസ് നടത്തുന്ന ടാക്സി വാഹനങ്ങളുടെ കാലപ്പഴക്കം ഏഴ് വർഷത്തേക്കാൾ കൂടാൻ പാടില്ല. മാത്രമല്ല, പൊതു സ്ഥലങ്ങളിലും വാണിജ്യ കേന്ദ്രങ്ങളിലും സർവിസ് നടത്തുന്ന ടാക്സികളുടെ കാലപ്പഴക്കം പത്ത് വർഷത്തിൽ കൂടാനും പാടില്ല. എല്ലാ ടാക്സി ഡ്രൈവർമാരും അടുത്ത വർഷം സെപ്റ്റംബർ ഒന്നിനു മുമ്പ് മേൽ പറഞ്ഞ കാര്യങ്ങൾ നടപ്പാക്കിയിരിക്കണം.
പൊതു ഗതാഗത സമ്പ്രദായം നടപ്പാക്കുന്നതിന്‍റെ ഭാഗമായി ഒന്നാം ഘട്ടമെന്ന നിലയിൽ വിമാനത്താവളത്തിൽ സർവിസ് നടത്തുന്ന ടാക്സികൾക്ക് ആപ്പുകൾ നടപ്പാക്കിയിരുന്നു. രണ്ടാം ഘട്ടത്തിന്‍റെ ഭാഗമായി അടുത്ത മാസം ഒന്നുമുതൽ ടൂറിസ്റ്റ് കോംപ്ലക്സുകളിലും ഹോട്ടലുകളിലും തുറമുഖങ്ങളിലും കൊമേഴ്സ്യൽ സെന്‍ററുകളിലും സർവിസ് നടത്തുന്ന ടാക്സികൾക്ക് കൂടി ആപ്പുകർ നടപ്പാക്കും.
21 വയസ്സിൽ താഴെയുള്ളവരെ ടാക്സി ഓടിക്കാൻ അനുവദിക്കാത്തത് അപകടങ്ങൾ ഒഴിവാക്കാൻ സഹായിക്കുമെന്ന് മന്ത്രാലയം വ്യക്തമാക്കി. ഡ്രൈവിങ് ലൈസൻസ് എടുത്ത് മൂന്ന് വർഷത്തിന് ശേഷം മാത്രമേ ടാക്സി ഓടിക്കാൻ അനുവദിക്കുകയുള്ളൂ എന്ന നിയമവും ഏറെ പ്രധാനമാണ്. അടുത്ത വർഷത്തോടെ ഒമാനിലെ എല്ലാ ടാക്സികളും ആപ്പിന് കീഴിൽ വരുമെന്നും മന്ത്രാലയം കൂട്ടിച്ചേർത്തു. എന്നാൽ ഇതോടെ ടാക്സി നിരക്കുകൾക്ക് ഏകീകൃത രൂപം വരുകയും ഡ്രൈവർമാർക്ക് യഥേഷ്ടം നിരക്കുകൾ ഈടാക്കാനുള്ള അവസരം നഷടമാവുകയും ചെയ്യും. മാത്രമല്ല, നിരക്ക് വിഷയത്തിലുള്ള തർക്കങ്ങളും വിലപേശലും അവസാനിക്കുകയും ചെയ്യും.
