ഗ്ലോബൽ വില്ലേജിന്റെ പുതിയ സീസണിലേക്കുള്ള വിഐപി പാക്കേജുകൾ അവതരിപ്പിച്ചു. വമ്പൻ ഓഫറുകളോടെയാണ് ഇത്തവണ ടിക്കറ്റുകൾ അവതരിപ്പിച്ചിരിക്കുന്നത്. ഡയമണ്ട്, മെഗാ ഗോൾഡ്, മെഗാ സിൽവർ എന്നിവയാണ് വിഐപി പാക്കേജുകൾ. എമിറേറ്റ്സ് ഐഡി ഉള്ള 18 വയസ് പൂർത്തിയായ ആർക്കും വിഐപി പായ്ക്ക് വാങ്ങാൻ സാധിക്കും.
ഡയമണ്ട്സ് വിഐപി പാക്കേജിന് 7,350 ദിർഹവും മെഗാ ഗോൾഡ് പാക്കേജിന് 4,745 ദിർഹവും മെഗാ സിൽവറിന് 3,245 ദിർഹവുമാണ് നിരക്ക്. പ്ലാറ്റിനത്തിന് 3,100 ദിർഹവും ഗോൾഡിന് 2,350 ദിർഹവും സിൽവറിന് 1,750 ദിർഹവുമാണ് നിരക്ക്. മെഗാ വിഐപി പാക്കേജ് എടുക്കുന്നവർക്ക് ദുബായ് പാർക്‌സ് ആന്റ് റിസോർട്സിലെ തീം പാർക്ക്, ദ് ഗ്രീൻ പ്ലാനറ്റ് ദുബായ്, റോക്സി സിനിമാസ് എന്നിവിടങ്ങളിൽ പരിധിയില്ലാതെ പ്രവേശിക്കാനും സാധിക്കും. അതോടൊപ്പം റയൽ മഡ്രിഡ് വേൾഡ്, മോഷൻ ഗേറ്റ്, ലെഗോ ലാൻഡ് എന്നിവിടങ്ങളിലും പ്രവേശനം ലഭിക്കും.
മെഗാ വിഐപി പാക്കേജുകളുടെ വിൽപന 21ന് രാവിലെ 10 മുതൽ 24 രാവിലെ 9 വരെ നടക്കും. സ്റ്റോക്ക് തീർന്നില്ലെങ്കിൽ വിൽപന നീട്ടും. പ്രീ ബുക്കിങ്ങിന് 150 ദിർഹം നൽകണം. ഡയമണ്ട്, പ്ലാറ്റിനം, ഗോൾഡ്, സിൽവർ പാക്കേജുകളുടെ വിൽപന 24ന് രാവിലെ 10ന് ആരംഭിക്കും. പ്രീ ബുക്കിങ്ങിന് അന്ന് അവസരവുമുണ്ടാകും. വിഐപി പാക്കേജുകളുടെ പൊതുവിൽപന 28ന് രാവിലെ 10ന് തുടങ്ങും. സ്റ്റോക്ക് തീരും വരെയാണ് വിൽപന.
ടിക്കറ്റിനായി tickets.virginmegastore.me. എന്ന വെബ്സൈറ്റും വിഐപി പാക്കേജുകളെക്കുറിച്ചുള്ള കൂടുതൽ വിവരങ്ങൾക്ക് www.globalvillage.ae എന്ന വെബ്സൈറ്റും സന്ദർശിക്കാം. ഒക്ടോബർ 16നാണ് ഗ്ലോബൽ വില്ലേജിൻ്റെ 29-ാം സീസൺ ആരംഭിക്കുന്നത്.
