മധ്യവേനൽ അവധി ആരംഭിക്കാനിരിക്കെ കുട്ടികൾക്ക് വമ്പൻ ഓഫറുമായി എത്തിയിരിക്കുകയാണ് അധികൃതർ. അവധിക്കാലത്ത് ദുബായ് ക്രോക്കോഡൈൽ പാർക്കിലേയ്ക്ക് കുട്ടികൾക്ക് സൗജന്യ പ്രവേശനമാണ് അനുവദിച്ചിരിക്കുന്നത്. 11 വയസുവരെയുള്ള കുട്ടികൾക്കാണ് സൗജന്യ പ്രവേശനം ലഭിക്കുക.
ജൂലൈ, ഓഗസ്റ്റ് മാസങ്ങളിലാണ് ദുബായ് ക്രോക്കോഡൈൽ പാർക്കിലേയ്ക്ക് കുട്ടികൾക്ക് സൗജന്യ പ്രവേശനം അനുവദിക്കുക. സാധാരണയായി പാർക്കിലേക്കുള്ള ടിക്കറ്റിന് മുതിർന്നവർക്ക് 95 ദിർഹവും കുട്ടികൾക്ക് 75 ദിർഹവുമാണ് ഈടാക്കുന്നത്. 3 വയസുവരെയുള്ള കുട്ടികൾക്ക് സൗജന്യ പ്രവേശനവുമാണ് നൽകുന്നത്. ഇതിലാണ് ഇപ്പോൾ കുട്ടികൾക്ക് ഇളവ് നൽകിയിരിക്കുന്നത്.
വംശനാശ ഭീഷണി ഉൾപ്പെടെ നേരിടുന്ന മുതലകളുടെ നിലനിൽപ്പിനായി മികച്ച സൗകര്യങ്ങളാണ് പാർക്കിൽ ഒരുക്കിയിരിക്കുന്നത്. ലോക മുതല ദിനാചരണത്തോടനുബന്ധിച്ച് മുതലകളുടെ പ്രാധാന്യത്തെക്കുറിച്ചും അവയുടെ സംരക്ഷണത്തിൻ്റെ ആവശ്യകതയെക്കുറിച്ചും അവബോധം സൃഷ്ടിക്കുന്നതിനായി വിവിധ പരിപാടികളും പാർക്കിൽ സംഘടിപ്പിച്ചിരുന്നു.
