ഒമാനിൽ വേനൽക്കാലത്ത് വൈദ്യുതി ബില്ലിന്റെ സബ്സിഡി 30 ശതമാനമായി വർധിപ്പിക്കാൻ തീരുമാനം. വൈദ്യുതിയുടെ ഉപഭോഗം ഏറ്റവും കൂടുന്ന ജൂലൈ, ആഗസ്റ്റ് മാസങ്ങളിലാണ് വൈദ്യുതി ബില്ലിന് സബ്സിഡി വർധിപ്പിക്കാൻ പബ്ലിക് സർവീസ് റഗുലേറ്ററി അതോറിറ്റി തീരുമാനിച്ചത്. നിലവിൽ 15 ശതമാനമാണ് ഇവിടെ സബ്സിഡി നൽകുന്നത്.
രാജ്യത്ത് താമസ വിഭാഗത്തിൽ ഉൾപ്പെടുന്ന എല്ലാ വിഭാഗങ്ങൾക്കും ഈ സബ്സിഡി ബാധകമായിരിക്കും. പുതിയ മാർഗനിർദ്ദേശമനുസരിച്ച് സ്വദേശികൾക്കൊപ്പം പ്രവാസികൾക്കും സബ്സിഡി ലഭിക്കും. വേനൽക്കാലത്തെ വൈദ്യുതി ബിൽ സംബന്ധിച്ച് നിരവധി പരാതികൾ ഉയർന്ന സാഹചര്യത്തിൽ മന്ത്രിസഭ നിയോഗിച്ച കമ്മീഷൻ വിഷയത്തേക്കുറിച്ച് പഠിച്ചശേഷം നൽകിയ റിപ്പോർട്ടിന്റെ അടിസ്ഥാനത്തിലാണ് പബ്ലിക് സർവീസ് റഗുലേറ്ററി അതോറിറ്റി സബ്സിഡി നൽകാൻ തീരുമാനിച്ചത്.
