ഈദുൽ ഫിത്തറിനോടനുബന്ധിച്ച് ലഭിച്ച നീണ്ട അവധി ദിവസങ്ങൾ ആഘോഷമാക്കിയിരിക്കുകയാണ് യുഎഇ നിവാസികൾ. വലിയ തിരക്ക് തന്നെയായിരുന്നു ഈ കാലയളവിൽ പൊതുസ്ഥലങ്ങളിൽ അനുഭവപ്പെട്ടിരുന്നത്. ഇപ്പോൾ പെരുന്നാളിനോടനുബന്ധിച്ച് ദുബായിലെ പൊതുഗതാഗതം ഉപയോഗിച്ചവരുടെ കണക്കുകൾ പുറത്തുവിട്ടിരിക്കുകയാണ് അധികൃതർ.
പെരുന്നാൾ ആഘോഷിക്കുന്നതിനായി നിരവധി സന്ദർശകരാണ് ഈ കാലയളവിൽ ദുബായിൽ എത്തിയത്. ദുബായിൽ ഈദുൽ ഫിത്തറിന്റെ അവധി ദിവസങ്ങളിൽ മാത്രം 5.9 ദശലക്ഷത്തോളം യാത്രക്കാരാണ് പൊതുഗതാഗത സംവിധാനങ്ങൾ ഉപയോഗിച്ചത്. ദുബായ് മീഡിയ ഓഫീസാണ് ഇത് സംബന്ധിച്ച റിപ്പോർട്ട് പുറത്തുവിട്ടത്.
യാത്രക്കാരിൽ 2.32 ദശലക്ഷം പേരാണ് മെട്രോ ഉപയോഗിച്ചത്. 1,15,000 പേർ ട്രാമും 1.20 ദശലക്ഷം പേർ ദുബായിലെ ബസ് സേവനങ്ങളും 4,16,000 പേർ ജലമാർഗവും 1.60 ദശലക്ഷം യാത്രികർ ടാക്സി സേവനങ്ങളും ഉപയോഗിച്ചു.
