പ്രവാസികളുടെ യാത്രാ ദുരിതത്തിന് ആശ്വാസമാകുന്നു. അബുദാബിയിൽ നിന്ന് മുംബൈയിലേയ്ക്ക് സർവ്വീസ് ആരംഭിക്കാനൊരുങ്ങുകയാണ് ആകാശ എയർലൈൻ. ജൂലൈ 11-നാണ് എയർലൈൻ പുതിയ സർവ്വീസ് ആരംഭിക്കുന്നത്.
മുംബൈയിൽ നിന്ന് വൈകിട്ട് 5.05ന് പുറപ്പെടുന്ന വിമാനം യുഎഇ സമയം വൈകിട്ട് 6.50ന് അബുദാബിയിൽ എത്തും. തിരിച്ച് രാത്രി 8.05ന് പുറപ്പെട്ട് അർധരാത്രി ഒരു മണിക്ക് മുംബൈയിൽ എത്തുകയും ചെയ്യും. മുംബൈയിൽ നിന്ന് കേരളത്തിലേയ്ക്ക് നിരവധി വിമാന കണക്‌ഷൻ സർവ്വീസുകൾ ഉള്ളതിനാൽ പുതിയ റൂട്ട് മലയാളികൾ ഉൾപ്പെടെയുള്ള ഇന്ത്യൻ പ്രവാസികൾക്ക് ആശ്വാസമാകും.
മാർച്ച് 28-ന് ഖത്തറിലേക്കായിരുന്നു ആകാശയുടെ പ്രഥമ രാജ്യാന്തര സർവീസ്. മുംബൈയിൽ നിന്ന് ജൂൺ 8-ന് ജിദ്ദയിലേക്കും 16-ന് റിയാദിലേക്കും സർവീസ് ആരംഭിച്ച ആകാശ എയറിന്റെ നാലാമത്തെ രാജ്യാന്തര സർവീസാണ് അബുദാബിയിലേത്. ദുബായ്, ഷാർജ തുടങ്ങി യുഎഇയിലെ മറ്റ് എയർപോർട്ടുകളിൽ നിന്നും ഇന്ത്യയിലെ വിവിധ സെക്‌ടറുകളിലേക്ക് സർവീസ് ആരംഭിക്കാനും കമ്പനി പദ്ധതിയിടുന്നുണ്ട്.
