കേരളത്തിലേയ്ക്കുള്ള സർവീസ് വെട്ടിക്കുറച്ച് എയർ ഇന്ത്യ എക്സ്പ്രസ്. കുവൈത്തിൽ നിന്ന് കോഴിക്കോട്ടേക്കും തിരിച്ചുമുള്ള എയർ ഇന്ത്യ എക്സ്പ്രസിന്റെ ബുധനാഴ്ചകളിലെ സർവീസാണ് വെട്ടിക്കുറച്ചത്. നവംബർ മാസത്തിലെ സർവീസുകളാണ് ഇത്തരത്തിൽ നിർത്തിവെച്ചിരിക്കുന്നത്. ബുധനാഴ്ചകളിൽ യാത്രക്കാരുടെ എണ്ണത്തിലുള്ള കുറവാണ് സർവീസ് വെട്ടിക്കുറയ്ക്കാൻ കാരണമെന്നാണ് വിലയിരുത്തുന്നത്.
നവംബർ മാസത്തിൽ ബുധനാഴ്ചകളിലേയ്ക്ക് ടിക്കറ്റ് എടുത്തവർക്ക് അടുത്ത ദിവസങ്ങളിലേയ്ക്ക് സൗജന്യമായി ടിക്കറ്റ് മാറ്റിയെടുക്കാൻ സാധിക്കുമെന്ന് എയർ ഇന്ത്യ അധികൃതർ അറിയിച്ചു. ഓഫ് സീസണായതിനാൽ അധിക ബാഗേജ് നിരക്കിൽ എയർ ഇന്ത്യ എക്സ്പ്രസ് നേരത്തെ വൻ ഇളവും പ്രഖ്യാപിച്ചിരുന്നു.
