സഞ്ചാരികൾക്ക് വിനോദത്തിന്റെ പുത്തൻ അനുഭവം പകർന്ന് കൂടുതൽ റൈഡുകളോടെ അബുദാബി യാസ് വാട്ടർവേൾഡ് വിപുലീകരിക്കുന്നു. ഇതിന്റെ ഭാഗമായി യാസ് ഐലൻഡിലെ യാസ് വാട്ടർവേൾഡിൽ 16,900 സ്‌ക്വയർ മീറ്റർ വിസ്തൃതിയിലുള്ള വിപുലീകരണ പ്രവർത്തനങ്ങളാണ് നടത്തുന്നതെന്ന് അധികൃതർ അറിയിച്ചു.
കൂടുതൽ സഞ്ചാരികളെ ഉൾക്കൊള്ളിക്കുന്നതിന്റെ ഭാഗമായാണ് തീരുമാനം. 2025-ൽ നിർമ്മാണം പൂർത്തിയാകുന്ന വിധത്തിലാണ് യാസ് വാട്ടർവേൾഡിന്റെ വിപുലീകരണ പ്രവർത്തനങ്ങൾ നടത്തുന്നത്. 3.3 കിലോമീറ്റർ നീളത്തിൽ പുതിയ സ്ലൈഡ് ഉപകരണങ്ങളും ഇവിടെ നിർമ്മിക്കും. ഇതോടെ യാസ് വാട്ടർവേൾഡിലേക്ക് മുൻപ് എത്തിയതിനേക്കാൾ 20 ശതമാനം കൂടുതൽ സന്ദർശകർ ഉൾക്കൊള്ളുമെന്നാണ് അധികൃതർ വ്യക്തമാക്കിയത്.
സാഹസികത ഇഷ്ടപ്പെടുന്ന സഞ്ചാരികൾക്ക് യുഎഇയിലെ ഏറ്റവും ഉയരമുള്ള സ്ലൈഡ് ഉൾപ്പടെ 18 പുതിയ റൈഡുകളാണ് യാസ് വാട്ടർവേൾഡിൽ ഉൾപ്പെടുത്തുന്നത്.
