കടൽക്കാറ്റേറ്റ്, പൂഴി മണലിൽ കാലുകൾ വേച്ചു നടന്ന്, സൊറകൾ പറഞ്ഞ്, കടലിന്റെ സൗന്ദര്യം ആസ്വദിച്ച്, അങ്ങനെ അങ്ങനെ… കുടുംബത്തോടൊപ്പം അവധി ദിനങ്ങൾ ആഘോഷമാക്കാൻ പലരും തിരഞ്ഞെടുക്കാറുള്ളത് ബീച്ചുകളാണ്. എന്നാൽ, ഇതൊന്നും കൺനിറയെ കണ്ട് ആസ്വദിക്കാൻ കാഴ്ച്ച പരിമിതിയുള്ളവർക്ക് കഴിയാറില്ല. അവരെ ചേർത്തു പിടിക്കുകയാണ് ഖത്തർ. കടലോരവും പാർക്കുകളുമെല്ലാം ആസ്വദിക്കാനെത്തുന്ന പൊതുജനങ്ങൾക്കൊപ്പം ഭിന്നശേഷിക്കാർക്കും മുഖ്യ പരിഗണന നൽകുകയാണ് ഖത്തർ മുനിസിപ്പാലിറ്റി മന്ത്രാലയം. കാഴ്ച വൈകല്യമുള്ള സന്ദർശകർക്ക് മറ്റുള്ളവരെ ആശ്രയിക്കാതെ തന്നെ ഇനി വക്ര ബീച്ചിലൂടെ നടന്നു നീങ്ങാനും, നിർദേശങ്ങൾ വായിച്ചറിയാനും തീരം ആസ്വദിക്കാനുമെല്ലാം കഴിയും. അൽ വക്റ ബീച്ചിൽ ഭിന്നശേഷി സൗഹൃദ നടപ്പാത തുറന്നു നൽകി വേറിട്ട മാതൃകയാവുകയാണ് ഖത്തർ. ഖത്തർ ദേശീയ വിഷൻ 2030ന്റെ ലക്ഷ്യങ്ങളുടെ ഭാഗമായാണ് ‘ഭിന്നശേഷി സൗഹൃദ വക്റ’ എന്ന സംരംഭം നടപ്പാക്കിയത്.
സമൂഹത്തിലെ എല്ലാ വിഭാഗം ജനങ്ങളെയും സേവിക്കാനുള്ള ഖത്തറിന്റെ ശ്രമങ്ങളുടെ ഭാഗമാണിത്. കാഴ്ചവൈകല്യമുള്ള സന്ദർശകർക്ക് വേഗത്തിലും എളുപ്പത്തിലും പ്രവേശനം ഉറപ്പാക്കുന്നതിന് വേണ്ടി ബ്രെയിൽ ലിപിയിൽ വിവരങ്ങൾ പ്രദർശിപ്പിക്കുന്ന അടയാളങ്ങളും നടപ്പാതയിൽ സ്ഥാപിച്ചിട്ടുണ്ട്. പൂർണമായും റീസൈക്കിൾ ചെയ്ത വസ്തുക്കളിൽ നിന്നാണ് നിർമിച്ചിരിക്കുന്നതെന്ന സവിശേഷതയും ഈ അടയാളങ്ങൾക്കുണ്ട്. ലോകത്തിന് തന്നെ മാതൃകയാവുകയാണ് ഖത്തറിന്റെ ഈ പദ്ധതി.
വൈകല്യമുള്ളവർക്ക് വേണ്ടി സുസ്ഥിരമായ ബീച്ച് വികസിപ്പിക്കുകയെന്ന ലക്ഷ്യം മുൻനിർത്തിയുള്ള പദ്ധതിയുടെ രണ്ടാം ഘട്ടമാണിതെന്ന് വാക്ക് വേ പദ്ധതിയുടെ ഉപദേഷ്ടാവ് സുഹ മഹ്മൂദ് തുഫൈലിയ പറഞ്ഞു. ചലന വൈകല്യമുള്ളവർക്കും പ്രായമായവർക്കും ബീച്ചിലെത്താൻ കഴിയുന്ന പ്രത്യേക കടൽ നടപ്പാത നിർമിച്ചു കൊണ്ട് 2022ലാണ് പദ്ധതിയുടെ ആദ്യഘട്ടം ഖത്തർ നടപ്പാക്കിയത്. ശേഷം, പൊതുജനാരോഗ്യ മന്ത്രാലയം കഴിഞ്ഞ വർഷം ഒക്ടോബറിൽ നടത്തിയ സർവേയിൽ രാജ്യത്തെ 8.1 ശതമാനം ആളുകൾ ഏതെങ്കിലും രീതിയിലുള്ള കാഴ്ചവൈകല്യം നേരിടുന്നതായി കണ്ടെത്തി. ഇവരിൽ 0.2 ശതമാനം പേരും ഗുരുതര കാഴ്ചവൈകല്യം മൂലം പ്രയാസപ്പെടുന്നവരാണ്. 0.3 ശതമാനം പേർക്ക് കാഴ്ചയുടെ അഭാവം കണ്ടെത്തിയതായും സർവേ റിപ്പോർട്ടിൽ മന്ത്രാലയം വ്യക്തമാക്കുന്നുണ്ട്. ഇനി അൽ വക്ര ബീച്ചിൽ അകകണ്ണുകൊണ്ട് അവരും ആനന്ദം കണ്ടെത്തും.
