യുഎഇയിലെ വിസ നിയന്ത്രണങ്ങൾ സംബന്ധിച്ച് ഒരാഴ്ചയയായി ഉയർന്ന ആശങ്കകൾക്ക് വിരാമമായതായി സൂചന. ജനസംഖ്യാ ദേശീയതയുടെ അടിസ്ഥാനത്തിൽ വിസ മാനദണ്ഡങ്ങൾ കർശനമാക്കിയ നീക്കത്തിൽ ഇളവുവരുത്തിയതായാണ് സൂചനകൾ. വിസ അപേക്ഷകർക്ക് നേരിട്ട കാലതാമസം ഒഴിവായെന്നും പുതിയ വിസകൾ അനുവദിച്ച് തുടങ്ങിയെന്നും വിസ സർവ്വീസ് മേഖലയിലെ കമ്പനികൾ പറയുന്നു.
നേരത്തെ ജീവനക്കാർക്കിടയിൽ വൈവിധ്യവത്കരണം നടപ്പാക്കുന്നതിൻ്റെ ഭാഗമായി വിസകൾ അനുവദിക്കുന്നതിന് നിയന്ത്രണം ഏർപ്പെടുത്തി എന്നായിരുന്നു പ്രചാരണം. സ്ഥാപനങ്ങൾ പുതിയ വർക്ക് പെർമിറ്റിനായി അപേക്ഷ സമർപ്പിക്കുമ്പോൾ ദേശീയതാ വൈവിദ്ധ്യം ചൂണ്ടിക്കാട്ടി അപേക്ഷകൾ നിരസിക്കുകയായിരുന്നെന്നും ഏജൻസികൾ പറഞ്ഞു. കമ്പനികളിലെ 20 ശതമാനം നിയമനം വിവിധ രാജ്യങ്ങളിൽനിന്നുളളവർ ആകണമെന്നായിരുന്നു വ്യവസ്ഥ.
മാനവ വിഭവശേഷി, എമിററ്റൈസേഷൻ മന്ത്രാലയത്തിൻ്റെ മുൻകാല നിർദ്ദേശം ലേബർ വിഭാഗം കർശനമാക്കിയതോടെയാണ് അപേക്ഷകൾക്ക് വിസ ലഭ്യമാകാൻ താമസം നേരിട്ടത്. ഇന്ത്യ, ബംഗ്ളാദേശ്, പാകിസ്ഥാൻ രാജ്യങ്ങളിലെ പ്രവാസികളെയാണ് നീക്കം പ്രഥമികമായി ബാധിച്ചത്. എന്നാൽ പുതിയ ഇളവുകൾ താത്കാലിമമാണോ, പൂർണമായി ഒഴിവാക്കിയതാണോ എന്നതടക്കം ഓദ്യോഗിക വിശദീകരണങ്ങൾ ലഭ്യമല്ല.
