മലയാളികളുടെ ഹൃദയത്തിൽ ചിരിപ്പിച്ച് ചിരപ്രതിഷഠ നേടിയ ഇന്നസെൻ്റിന് കണ്ണീരോടെ വിടചൊല്ലി കേരളം. നടനും ചാലക്കുടി മുൻ എംപിയുമായ ഇന്നസെൻ്റിൻ്റെ (75) ഭൗതിക ശരീരം സംസ്ഥാന സർക്കാരിൻ്റെ ഔദ്യോഗിക ബഹുമതികളോടെ ഇരിങ്ങാലക്കുട സെൻ്റ് തോമസ് കത്തീഡ്രല്‍ സെമിത്തേരിയിൽ സംസ്കരിച്ചു. ചലച്ചിത്ര, രാഷ്ട്രീയ- സാംസ്കാരിക രംഗത്തെ നിരവധിയാളുകൾ സംസ്കാര ചടങ്ങിൽ പങ്കെടുത്തു. ഇന്നസെൻ്റിൻ്റെ വസതി പാർപ്പിടത്തിലെ പൊതുദർശനത്തിനുശേഷം വിലാപയാത്രയായാണ് ഭൗതിക ശരീരം പള്ളിയിലെത്തിച്ചത്. ഞായറാഴ്ച രാത്രി 10.30ന് എറണാകുളം ലേക്‌ഷോർ ആശുപത്രിയിലായിരുന്നു അദ്ദേഹത്തിൻ്റെ വിയോഗം.
കടവന്ത്ര രാജീവ് ഗാന്ധി ഇൻഡോർ സ്റ്റേഡിയത്തിലും ഇരിങ്ങാലക്കുട ടൗൺ ഹാളിലും പൊതുദർശനം കഴിഞ്ഞശേഷം തിങ്കളാഴ്ച വൈകിട്ടാണ് വീട്ടിലേക്കെത്തിച്ചത്. കടവന്ത്രയിൽനിന്ന് ഇരിങ്ങാലക്കുടയിലേക്ക് വിലാപയാത്രയായാണ് ഭൗതിക ശരീരം കൊണ്ടുപോയത്. മുഖ്യമന്ത്രി പിണറായി വിജയനും ഭാര്യ കമലയും ടൗൺ ഹാളിലെത്തി ആദരാഞ്ജലി അർപ്പിച്ചിരുന്നു.
നൃത്തശാല (1972) ആണ് ഇന്നസെൻ്റിൻ്റെ ആദ്യസിനിമ. 700ൽ അധികം സിനിമകളിൽ അഭിനയിച്ച അദ്ദേഹം മലയാളത്തിനു പുറമേ ഹിന്ദി, തമിഴ്, കന്നഡ, ഇംഗ്ലിഷ് ഭാഷകളിലും അഭിനയിച്ചിട്ടുണ്ട്. 1989ൽ മികച്ച രണ്ടാമത്തെ നടനുള്ള സംസ്ഥാന ചലച്ചിത്ര പുരസ്കാരം (ചിത്രം: മഴവിൽക്കാവടി) നേടിയിട്ടുണ്ട്. 2000 മുതൽ 2018 വരെ താരസംഘടന അമ്മയുടെ പ്രസിഡൻ്റായി പ്രവർത്തിച്ചു. 1979ൽ ഇരിങ്ങാലക്കുട നഗരസഭാ കൗൺസിലറായ അദ്ദേഹം 2014ൽ ചാലക്കുടി പാർലമെൻ്റ് മണ്ഡലത്തിൽ യുഡിഎഫിൻ്റെ പി.സി.ചാക്കോയ്ക്കെതിരെ ഇടതുപക്ഷ സ്വതന്ത്ര സ്ഥാനാർഥിയായി വിജയിച്ചു.
