ആർക്ക് വേണമെങ്കിലും ആരെ വേണമെങ്കിലും ബോംബ് വച്ച് കൊല്ലാൻ കഴിയുന്ന തരത്തിൽ കേരളത്തിലെ ക്രമസമാധാനപാലനം തകർന്നിരിക്കുന്നു എന്ന വിമർശനവുമായി കേന്ദ്രമന്ത്രി വി.മുരളീധരൻ. ഭീകരവാദികളെ പിന്തുണയ്ക്കാൻ കേരളത്തിൽ ഇടതു – വലതു മുന്നണികൾ തമ്മിൽ മത്സരിക്കുകയാണ്. യുഡിഎഫിന്റെയും എൽഡിഎഫിന്റെ നേതാക്കൾ ഒരുമിച്ചാണ് തീരുമാനങ്ങളെടുക്കുന്നത് എന്നും അദ്ദേഹം ആരോപിച്ചു. രണ്ടു കൂട്ടരും ഒറ്റ മുന്നണിയാണെന്നും അദ്ദേഹം പറഞ്ഞു. ചേർത്തലയിൽ എൻഡിഎ ശിൽപശാല ഉദ്ഘാടനം ചെയ്യുകയായിരുന്നു അദ്ദേഹം.
അതേസമയം കേരളീയം എന്ന പേരിൽ നടക്കുന്ന ധൂർത്ത് കൊണ്ട് കേരള ജനതയ്ക്ക് യാതൊരു പ്രയോജനവുമില്ലെന്നും പരിപാടിയുടെ യഥാർഥ ചെലവ് 50 കോടിയിൽ കുറയില്ലെന്നും മുരളീധരൻ കൂട്ടിച്ചേർത്തു.’നാല് മാസമായി പെൻഷൻ കൊടുക്കാത്തവരാണ് ഇത്രയും വലിയ പരിപാടി നടത്തുന്നത്. മമ്മൂട്ടിയെയും മോഹൻലാലിനെയും കൂടെ നിർത്തി സെൽഫി എടുത്താൽ പാവങ്ങളുടെ വയർ നിറയില്ല. അവരുടെ വിശപ്പടക്കാൻ കഴിയില്ല’- വി. മുരളീധരൻ പറഞ്ഞു.
മാത്രമല്ല, മരുന്ന് വാങ്ങാൻ ഗതിയില്ലാത്തവരെ ഇരുത്തിക്കൊണ്ട് കമൽഹാസന്റെ പ്രസംഗം കേൾപ്പിക്കാനുള്ള ധൈര്യം പിണറായി വിജയൻ സർക്കാരിന് മാത്രമാണുള്ളത്. കേരളീയത്തിന്റെ കാര്യത്തിൽ കെ എൻ ബാലഗോപാലിന് ഒരു ഞെരുക്കവുമില്ല. ഇത്രയും പച്ചക്കള്ളം ആവർത്തിച്ച് പറയുന്ന ഒരു ധനകാര്യമന്ത്രി ഇന്ന്ഉ വരെ ഉണ്ടായിട്ടുമില്ലെന്നും അദ്ദേഹം കൂട്ടിച്ചേർത്തു.
