ഖത്തർ ലോകകപ്പിൽ വെയ്ല്‍സിനെ തോൽപിച്ച് ഇംഗ്ലണ്ടും ഇറാനെ വീഴ്ത്തി യുഎസ്എയും പ്രീ ക്വാര്‍ട്ടറിൽ. വെയില്‍സിനെ ഒന്നിനെതിരെ മൂന്ന് ഗോളുകള്‍ക്ക് നിലംപരിശാക്കിയാണ് ഇംഗ്ലണ്ട് ഗ്രൂപ്പ് ചാമ്പ്യന്‍മാരായി പ്രീ ക്വാര്‍ട്ടറിലെത്തിയത്. ഇറാനെ പ്രതിരോധിച്ച് ഒരു ഗോള്‍ ജയവുമായാണ് യുഎസ്എ രണ്ടാം സ്ഥാനക്കാരായി ബി ഗ്രൂപ്പില്‍ നിന്ന് പ്രീ ക്വാര്‍ട്ടറിലെത്തിയിരിക്കുന്നത്. ഏഴ് പോയിന്‍റുള്ള ഇംഗ്ലണ്ടാണ് ഗ്രൂപ്പിലെ ചാമ്പ്യന്‍മാര്‍. അഞ്ച് പോയിന്‍റുമായി യുഎസ്എ രണ്ടാം സ്ഥാനത്താണ്.
പ്രീ ക്വാര്‍ട്ടറില്‍ ഇംഗ്ലണ്ട് എ ഗ്രൂപ്പ് റണ്ണറപ്പ് ടീം സെനഗലിനെ നേരിടുമ്പോള്‍ എ ഗ്രൂപ്പ് ചാമ്പ്യന്‍മാരായ നെതര്‍ലന്‍ഡ്സാണ് യുഎസ്എയുടെ എതിരാളികള്‍.
അതേസമയം ലോകകപ്പ് ഫുട്ബോളിൽ ആതിഥേയരായ ഖത്തർ മൂന്നാം തോല്‍വി ഏറ്റുവാങ്ങി. ഗ്രൂപ്പ് എയിലെ അവസാന മത്സരത്തില്‍ ഖത്തറിനെ 2-0ന് വീഴ്ത്തി നെതര്‍ലന്‍ഡ്സ് ഏഴ് പോയിൻ്റ് നേടി ഗ്രൂപ്പ് ചാമ്പ്യന്‍മാരായി പ്രീ ക്വാര്‍ട്ടറിലെത്തി.
ഗ്രൂപ്പ് എയിലെ മറ്റൊരു മത്സരത്തിൽ ഇക്വഡോറിനെ ഒന്നിനെതിരെ രണ്ട് ഗോളുകള്‍ക്ക് തോല്‍പ്പിച്ച് സെനഗലും പ്രീ ക്വാര്‍ട്ടറിലെത്തി.
