എമിറേറ്റൈസേഷൻ നിയമങ്ങൾ മറികടക്കുന്ന കമ്പനികൾക്ക് 500,000 ദിർഹം വരെ പിഴ ചുമത്തുമെന്ന് മാനവ വിഭവശേഷി, സ്വദേശിവൽക്കരണ മന്ത്രാലയം (MoHRE) അറിയിച്ചു. ജീവനക്കാരുടെ എണ്ണം കുറയ്ക്കുകയോ അവരുടെ വർഗ്ഗീകരണം പരിഷ്കരിക്കുകയോ ചെയ്യുന്നതും നിയമത്തെ മറികടക്കാനുള്ള മറ്റേതെങ്കിലും പദ്ധതിയും എമിറേറ്റൈസേഷൻ നിയമങ്ങളിൽ ഉൾപ്പെടുന്നു.
യുഎഇ കാബിനറ്റ് പുറപ്പെടുവിച്ച പ്രമേയങ്ങൾ അനുസരിച്ച്, അൻപതോ അതിൽ കൂടുതൽ ജീവനക്കാരോ ഉള്ള സ്വകാര്യ സ്ഥാപനങ്ങൾ തങ്ങളുടെ വൈദഗ്ധ്യമുള്ള തൊഴിലാളികളുടെ എണ്ണം ഓരോ ആറ് മാസത്തിലും ഒരു ശതമാനം വർദ്ധിപ്പിക്കണം. എല്ലാ വർഷവും രണ്ട് ശതമാനം എമിറേറ്റൈസേഷൻ നിരക്കും നേടിയിരിക്കണം.
ആദ്യമായി എമിറേറ്റൈസേഷൻ നിയമങ്ങൾ ലംഘിക്കുന്നുവെന്ന് തെളിയിക്കപ്പെട്ട കമ്പനികൾക്ക് 100,000 ദിർഹം പിഴ ചുമത്തും. വീണ്ടും ലംഘനം ആവർത്തിച്ചാൽ 300,000 ദിർഹം പിഴയും മൂന്നാമത്തെ കുറ്റത്തിന് 500,000 ദിർഹം പിഴയും ലഭിക്കും. മൂന്നാം തവണയും സമാനമായ ലംഘനങ്ങൾ ആവർത്തിച്ചാൽ 500,000 ദിർഹവും പിഴ ചുമത്തുമെന്നും മൊഹ്രെ പറഞ്ഞു.
ടാർഗെറ്റ് ചെയ്‌ത കമ്പനികൾ 2026 ന്റെ അവസാനത്തോടെ 10 ശതമാനം എമിറേറ്റൈസേഷൻ നിരക്കിൽ എത്തുമെന്നാണ് പ്രതീക്ഷിക്കുന്നത്. ഇത് പാലിക്കുന്നതിൽ പരാജയപ്പെടുന്നവർക്ക് അർദ്ധ വാർഷിക ടാർഗെറ്റുകൾ അനുസരിച്ച് നിയമിക്കാത്ത ഓരോ എമിറാത്തിയ്ക്കും 42,000 ദിർഹം പിഴയും ചുമത്തുമെന്ന് മൊഹ്രെ കൂട്ടിച്ചേർത്തു.
