വാഹനാപകടത്തിൽപ്പെട്ടവരുടെ ജീവൻ രക്ഷിക്കാൻ സഹായിച്ച ഓഫ് ഡ്യൂട്ടി ഡോക്ടറെ ആദരിച്ച് അജ്മാൻ പോലീസ്. അജ്മാൻ എമിറേറ്റിലെ മസ്ഫൂട്ട് ഏരിയയിൽ വച്ച് ഡോക്ടർ നൂർ സബാഹ് നസീർ വാഹനം ഓടിക്കുമ്പോൾ മുന്നിൽ ഒരു അപകടം ശ്രദ്ധയിൽപ്പെട്ടു.
ഉടൻ തന്നെ തൻ്റെ വാഹനം പാർക്ക് ചെയ്ത് അപകടസ്ഥലത്തേക്ക് എത്തുകയും പരിക്കേറ്റവരെ പരിശോധിക്കുകയും ദേശീയ ആംബുലൻസ് എത്തുന്നതുവരെ അവർക്ക് പ്രഥമശുശ്രൂഷ നൽകുകയും ചെയ്തു. ഡോക്ടർ നൂർ സബാഹിന്റെ പെട്ടെന്നുള്ള ശുശ്രൂഷമൂലം പരിക്കേറ്റവരുടെ ജീവൻ രക്ഷിക്കുന്നതിൽ ഒരു പ്രധാന പങ്ക് വഹിച്ചു. വാഹനത്തിൽ കുടുങ്ങിയവരെ പുറത്തെടുക്കാനും അവർ സഹായിച്ചു.
അജ്മാൻ പോലീസ് ട്രാഫിക് ആൻഡ് പട്രോൾ ഡിപ്പാർട്ട്‌മെൻ്റ് ഡെപ്യൂട്ടി ഡയറക്ടർ ലെഫ്റ്റനൻ്റ് റാഷിദ് ഹമീദ് ബിൻ ഹിന്ദി, ഡോ. നൂരിൻ്റെ കർത്തവ്യബോധത്തെയും സമൂഹത്തോടുള്ള സേവനത്തെയും പ്രശംസിച്ചുകൊണ്ട് പ്രശംസാപത്രം നൽകി. രാജ്യത്തോടും ജനങ്ങളോടുമുള്ള ദേശീയവും ധാർമ്മികവുമായ കടമയാണ് താൻ ചെയ്തതെന്ന് ഡോ നൂർ നസീർ വ്യക്തമാക്കി.
