യുഎഇയുടെ 52-മത് ദേശീയ ദിനത്തിന്റെ ഭാഗമായി നടക്കുന്ന ഔദ്യോഗിക പൊതുപരിപാടികളുടെ ടിക്കറ്റ് വില്പന ആരംഭിച്ചു. ഡിസംബർ 5 മുതൽ 12 വരെ ദുബായ് എക്സ്പോ സിറ്റിയിലെ ജൂബിലി പാർക്കിൽ വെച്ചാണ് ആഘോഷപരിപാടികൾ സംഘടിപ്പിക്കുന്നത്.
പൊതുപരിപാടികളിൽ പൊതുജനങ്ങൾക്ക് പങ്കെടുക്കുന്നതിനായുള്ള ടിക്കറ്റുകൾ https://uaenationalday.ae/ എന്ന വെബ്സൈറ്റിൽ നിന്ന് ലഭ്യമാണെന്ന് യുഎഇ നാഷണൽ ഡേ ഓർഗനൈസിങ്ങ് കമ്മിറ്റി അറിയിച്ചു. ഡിസംബർ 2-ന് നടക്കുന്ന ഔദ്യോഗിക പൊതു ആഘോഷപരിപാടികൾ എല്ലാ പ്രാദേശിക ടെലിവിഷൻ ചാനലുകളിലും ഔദ്യോഗിക വെബ്സൈറ്റിലും തത്സമയം സംപ്രേക്ഷണം ചെയ്യുമെന്നും അധികൃതർ വ്യക്തമാക്കി.
സുസ്ഥിരതയിലൂന്നിയ യുഎഇയുടെ പ്രവർത്തനവും രാജ്യത്തിന്റെ ഒത്തൊരുമയും വ്യക്തമാക്കുന്ന രീതിയിലാണ് ഈ വർഷത്തെ ദേശീയദിന ഔദ്യോഗിക പരിപാടികൾ സംഘടിപ്പിക്കുന്നത്. യുഎഇയുടെ പൈതൃകവും എമിറാത്തി സംസ്കാരവും വിളിച്ചോതുന്ന വിവിധ പരിപാടികളോടൊപ്പം പരമ്പരാഗത നെയ്ത്ത് വിദ്യ ഉൾപ്പെടെയുള്ളവയും അവതരിപ്പിക്കപ്പെടും.
