ഒമാൻ വിഷൻ 2040ന്റെ ഭാഗമായി മസീറ വിലായത്തിൽ വിവിധോദ്ദേശ്യ തുറമുഖം വികസിപ്പിക്കാനൊരുങ്ങി ഒമാൻ. കൃഷി, മത്സ്യബന്ധനം, ജലവിഭവ മന്ത്രാലയത്തിലെ ഫിഷിങ് പോർട്സ് ആക്ടിങ് ഡയറക്ടർ ജനറൽ സെയ്ഫ് ബിൻ അബ്ദുല്ല അൽ അമിരിയാണ് ഇക്കാര്യം അറിയിച്ചത്. പ്രാദേശിക റേഡിയോക്ക് നൽകിയ അഭിമുഖത്തിലാണ് അദ്ദേഹം ഇക്കാര്യം വെളിപ്പെടുത്തിയത്. സർക്കാറിന്റെ നിർദേശങ്ങളുടെ ഭാഗമായാണ് മസീറ വിലായത്തിൽ വിവിധോദ്ദേശ്യ തുറമുഖം സ്ഥാപിക്കുന്നതെന്നും അദ്ദേഹം കൂട്ടിച്ചേർത്തു.
ഫിഷറീസ്, ടൂറിസം, ഗതാഗത മേഖലകളിൽ സുരക്ഷാ സൗകര്യങ്ങളോട് കൂടിയ സേവനം നൽകുന്നതിനായി ജൂൺ 26ന് തുറമുഖ നിർമാണത്തിനായുള്ള ടെൻഡർ നൽകിയിട്ടുണ്ട്. കരയും സമുദ്രവും ഉൾപ്പെടെ 18,00000 ചതുരശ്ര മീറ്ററാണ് പുതിയ പദ്ധതിയുടെ ആകെ വിസ്തീർണമെന്ന് അൽ അമിരി ചൂണ്ടിക്കാട്ടി. കൂടാതെ ബ്രേക്ക് വാട്ടറുകൾക്കായി ഫ്ലോട്ടിങ് ആങ്കറുകളും ഉണ്ടായിരിക്കും. അതിന്റെ നീളം 4,172 മീറ്ററായി വർധിപ്പിക്കുകയും ചെയ്യും. കോസ്റ്റ് ഗാർഡിന് 132 മീറ്റർ നീളമുള്ള ഫിക്സഡ് ബർത്ത്, സമുദ്രഗതാഗതത്തിനായി 132 മീറ്റർ നീളമുള്ള ഫിക്സഡ് ബർത്ത്, യാത്രക്കാർക്കുള്ള ടെർമിനൽ, ടൂറിസ്റ്റ് യാച്ചുകൾക്ക് നാല് ബെർത്തുകൾ, ഫെറികൾക്ക് സ്ലൈഡ് എന്നിവയും പദ്ധതിയിൽ ഉൾപ്പെടുമെന്നും അദ്ദേഹം കൂട്ടിച്ചേർത്തു.
സർഫിങ്, ജനവാസമില്ലാത്ത ബീച്ചുകൾ, മനോഹരമായ കടൽക്കാഴ്ചകൾ,പക്ഷി നിരീക്ഷണം, ദുർഘടമായ ഭൂപ്രദേശങ്ങൾ എന്നിവക്ക് പേരുകേട്ട മസീറ ദ്വീപ് വർഷം മുഴുവനും സന്ദർശകരെത്തുന്ന സ്ഥലമാണ്. ഇവിടുത്തെ കടൽത്തീരങ്ങൾ ആമകളുടെ ആവാസ കേന്ദ്രമാണ്. മസീറ ബീച്ചുകളിലെ കടലാമകളാണ് വിനോദസഞ്ചാരികളെ കൂടുതലായി ആകർഷിക്കുന്നത്.
