അടുത്ത അധ്യയന വർഷത്തിലേക്ക് സ്വകാര്യ സ്കൂളുകളും കിന്റർ ഗാർഡനുകളും ആരംഭിക്കുന്നതിനുള്ള ലൈസൻസ് രജിസ്ട്രേഷൻ നവംബർ 11ന് തുടങ്ങും. വിദ്യാഭ്യാസ-ഉന്നത വിദ്യാഭ്യാസ മന്ത്രാലയമാണ് രജിസ്ട്രേഷൻ സംബന്ധിച്ച് അറിയിപ്പ് നൽകിയത്.
നവംബർ 11 മുതൽ ഡിസംബർ 31 വരെയാണ് റജിസ്റ്റർ ചെയ്യാനുള്ള അവസരം ലഭിക്കുക. ഇതിനുപുറമെ സ്വകാര്യ സ്കൂളുകളും കിന്റർ ഗാർഡനുകളും ആരംഭിക്കുന്നതിനുള്ള വ്യവസ്ഥകളും നടപടിക്രമങ്ങളും സംബന്ധിച്ച് അധികൃതർ മാർഗനിർദേശം പുറത്തിറക്കിയിട്ടുണ്ട്. അവ പാലിച്ചുകൊണ്ടുള്ള അപേക്ഷകൾ മാത്രമേ പരിഗണിക്കുകയുള്ളുവെന്നും അധികൃതർ അറിയിച്ചു.
അപേക്ഷകൻ വിദ്യാഭ്യാസ മന്ത്രാലയത്തിലോ അനുബന്ധ സ്ഥാപനങ്ങളിലോ ജോലി ചെയ്യുന്നവരാകാൻ പാടില്ല, പ്രായം 21 വയസിൽ കുറയാൻ പാടില്ല, അപേക്ഷയ്ക്കൊപ്പം ആവശ്യപ്പെടുന്ന രേഖകളിൽ ഖത്തർ ഐഡിയുടെ പകർപ്പുണ്ടാകണം എന്നിങ്ങനെയാണ് നിബന്ധനകൾ. വിദ്യാഭ്യാസ മന്ത്രാലയത്തിന്റെ https://www.edu.gov.qa/ar/Pages/HomePage.aspx എന്ന വെബ്സൈറ്റിലൂടെ രജിസ്ട്രേഷൻ നടപടികൾ പൂർത്തിയാക്കാൻ സാധിക്കും.
