കുട്ടികളുള്ള സര്‍ക്കാര്‍ ജോലിക്കാരായ ഖത്തരി സ്ത്രീകളുടെ തൊഴില്‍ സമയം കുറയ്ക്കാന്‍ പദ്ധതി. സ്കൂളിൽ പഠിക്കുന്ന കുട്ടികളുള്ള സർക്കാർ ജോലിക്കാരായ സ്ത്രീകളുടെ പ്രവൃത്തി സമയത്തിലാണ് മാറ്റം വരിക. ഇതിന്റെ പ്രാരംഭഘട്ടം മധ്യകാല അവധിക്കാലത്ത് നടപ്പാക്കുമെന്ന് അധികൃതർ വ്യക്തമാക്കി.
സമയക്രമത്തിൽ മാറ്റം വരുന്നതോടെ സ്കൂളിൽ പഠിക്കുന്ന കുട്ടികളുള്ള ഖത്തരി സ്ത്രീകളുടെ ജോലി സമയം ഉച്ചയ്ക്ക് 12 മണിക്ക് അവസാനിക്കും. സ്ത്രീ ശാക്തീകരണവും സ്ത്രീകളിലെ അമിത സമ്മർദ്ദം കുറയ്ക്കുന്നതിനുമായാണ് പദ്ധതി നടപ്പാക്കുന്നത്. സ്വകാര്യ സ്ഥാപനങ്ങളിലെ ഖത്തരി സ്ത്രീകൾക്ക് പദ്ധതിയുടെ പ്രയോജനം ലഭ്യമാകില്ല.
ഡിസംബർ 24 മുതൽ ജനുവരി നാല് വരെയുള്ള കാലയളവിൽ പദ്ധതി പരീക്ഷണാടിസ്ഥാനത്തിൽ പ്രാവർത്തികമാക്കാനാണ് തീരുമാനം. തുടർന്ന് തൊഴിൽ സമയം കുറയ്ക്കുന്നത് കൊണ്ടുണ്ടാകുന്ന ഗുണങ്ങളും ദോഷങ്ങളും സിവിൽ സർവീസ് അന്റ് ഗവൺമെന്റ്റ് ഡെവലപ്മെന്റ് ബ്യൂറോ വിലയിരുത്തുകയും ചെയ്യുമെന്നും അധികൃതർ വ്യക്തമാക്കി.
