ഖത്തറിന്റെ ദേശീയ വിമാന കമ്പനിയായ ഖത്തർ എയർവേയ്സിന് രണ്ട് അന്താരാഷ്ട്ര പുരസ്‌കാരങ്ങൾ. ലണ്ടനിൽ നടന്ന ഇന്റർനാഷനൽ ബ്രില്യൻസ് അവാർഡിൽ രണ്ട് ഹ്യൂമൻ റിസോഴ്‌സ് (എച്ച്.ആർ) അംഗീകാരങ്ങളാണ് ഖത്തർ എയർവേസ് സ്വന്തമാക്കിയത്. ആഭ്യന്തര കമ്യൂണിക്കേഷനിൽ സാങ്കേതികവിദ്യ ഉപയോഗിക്കുന്നതിനുള്ള ഗോൾഡ് അവാർഡ്, ജീവനക്കാരുടെ ഇടപഴകലിനുള്ള ബ്രില്യൻസ് അവാർഡ് എന്നീ രണ്ട് വിഭാഗങ്ങളിലാണ് ഖത്തർ എയർവേസ് വീണ്ടും അന്താരാഷ്ട്ര അംഗീകാരത്തിന് അർഹത നേടിയത്.
ലോകത്തിന്റെ വിവിധ ഭാഗങ്ങളിലായി ഇന്റേണൽ കമ്യൂണിക്കേഷൻ വിഭാഗത്തിലും മാനവ വിഭവശേഷി വിഭാഗത്തിലും മികവ് പുലർത്തുന്ന സ്ഥാപനങ്ങൾക്കും വ്യാപാരങ്ങൾക്കുമുള്ള സുപ്രധാന അംഗീകാരങ്ങളിലൊന്നായാണ് ബ്രിട്ടൻ ആസ്ഥാനമായുള്ള ഇന്റർനാഷനൽ ബ്രില്യൻസ് അവാർഡുകൾ അറിയപ്പെടുന്നത്. വർഷം തോറും നൂതനമായി രൂപകൽപന ചെയ്ത് നടപ്പാക്കിയ ഇന്റേണൽ കമ്യൂണിക്കഷനുകളുടെയും മാനവ വിഭവശേഷി തന്ത്രങ്ങളുടെയും മികച്ച സംഭാവനകളെ ഇന്റർനാഷനൽ ബ്രില്യൻസ് അവാർഡുകൾ ആദരിക്കുന്നു.
ഡിയാജിയോ, ലിങ്ക്ഡ്ഇൻ,ഡെലോയിറ്റ് എന്നിവയുൾപ്പെടുന്ന ആഗോള ബിസിനസ് രംഗത്തെ വിദഗ്ധർ, മാനവ വിഭവശേഷി വകുപ്പിലെ ഉന്നത ഉദ്യോഗസ്ഥർ എന്നിവരടങ്ങുന്ന പാനലാണ് പുരസ്‌കാരങ്ങൾ നിർണയിക്കുന്നത്. കൂടാതെ നൂതനപ്രവർത്തനാന്തരീക്ഷം സൃഷ്ടിക്കുന്നതിലും പരിപോഷിപ്പിക്കുന്നതിലുമുള്ള ഖത്തർ എയർവേസിന്റെ ശ്രമങ്ങൾക്കും പ്രത്യേക അംഗീകാരം ലഭിച്ചിട്ടുണ്ട്.
അതേസമയം തങ്ങളുടെ ജീവനക്കാർക്കായി ‘പീപ്ൾ എക്‌സ്’ എന്ന മൊബൈൽ ആപ്ലിക്കേഷൻ ഖത്തർ എയർവേസ് ഈയിടെയാണ് പുറത്തിറക്കിയത്. എച്ച്.ആർ എംപ്ലോയി പരിചയ സമ്പത്തും ഐ.ടി ടീമുകളും തമ്മിലുള്ള സഹകരണത്തിന്റെ ഫലമാണ് ‘പീപ്ൾ എക്‌സ്’ എന്ന ആപ്പ്. ജീവനക്കാർക്ക് ആവശ്യമായ ഉപകരണങ്ങളിലേക്കും വിഭവങ്ങളിലേക്കും സൗകര്യപ്രദമായ പ്രവേശനം നൽകുന്നതിന് ഉപയോക്തൃ സൗഹൃദ ഡിജിറ്റൽ ഗേറ്റ് വേ ആയും ഈ ആപ്പ് പ്രവർത്തിക്കുന്നുണ്ട്.
