യാത്രക്കാരുടെ എണ്ണം കൂടുന്നു; സർവീസുകൾ വർധിപ്പിക്കാനൊരുങ്ങി ഖത്തർ എയർവേയ്‌സ്

യാത്രക്കാരുടെ എണ്ണം കൂടുന്നതിനാൽ സർവീസുകൾ വർധിപ്പിക്കാനൊരുങ്ങി ഖത്തർ എയർവേയ്‌സ്. ഡിസംബർ മാസത്തിലെ ശൈത്യകാല അവധിക്കാല യാത്രകൾ സുഗമമാക്കുന്നതിന്റെ ഭാഗമായാണ് ഖത്തർ എയർവേയ്‌സ് വിമാന സർവീസുകൾ വർധിപ്പിക്കുന്നത്.

ആംസ്റ്റർഡാം, ബാങ്കോക്ക്, ബാർസിലോന, ബൽഗ്രേഡ്, മിയാമി എന്നീ നഗരങ്ങളിലേക്കുള്ള സർവീസുകളാണ് ഖത്തർ എയർവേയ്‌സ് കൂട്ടിയത്. ഡിസംബർ 15 മുതൽ ബാങ്കോക്കിലേക്കുള്ള നിലവിലെ പ്രതിവാര സർവീസുകൾ 38 ആയി ഉയർത്തും. 16 മുതൽ ആംസ്റ്റർഡാമിലേക്കുള്ള സർവീസുകൾ 14 ആയും വർധിപ്പിക്കും. ഡിസംബർ 23 മുതൽ ബൽഗ്രേഡിലേക്കുള്ള സർവീസ് ആഴ്ചയിൽ 18 എന്നത് 21 ആയും ഉയർത്തും.

ജനുവരി ഒന്ന് മുതൽ ബാർസലോനയിലേക്ക് ആഴ്ചയിൽ 3 സർവീസുകൾ കൂടി ആരംഭിച്ച് സർവീസുകൾ 21 ആയും ജനുവരി 13 മുതൽ മിയാമിയിലേക്കുള്ള പ്രതിവാര സർവീസുകൾ 10 ആയും വർധിപ്പിക്കും.