മറുനാടൻ മലയാളി യൂട്യൂബ് ചാനലിനെതിരെ നടൻ പൃഥ്വിരാജ് രംഗത്ത്. ചാനലിൽ തനിക്ക് എതിരായി വന്ന വ്യാജ വാർത്തയിൽ നിയമപരമായി കേസ് നൽകുമെന്നാണ് താരം ഇപ്പോൾ അറിയിച്ചിരിക്കുന്നത്. സോഷ്യൽ മീഡിയയിലൂടെ ആയിരുന്നു താരത്തിന്റെ പ്രതികരണം.
എൻഫോഴ്സ്മെന്റ് ഡയറക്ടറേറ്റ് സ്വീകരിച്ച നടപടികൾക്ക് പിഴയായി താരം 25കോടി നൽകി എന്നായിരുന്നു ചാനലിന്റെ വാർത്ത. എന്നാൽ ഇത്തരത്തിൽ ഒരു വ്യാജ വാർത്ത നൽകിയത് തന്റെ ശ്രദ്ധയിൽ പെട്ട് എന്നും ഈ ആരോപണം തീർത്തും അസത്യവും വ്യാജവും ആണെന്നും ചാനലിനെതിരെ ശക്തമായ നിയമ നടപടികൾ ആരംഭിക്കുകയാണ് എന്നും ആണ് താരം പറഞ്ഞിരിക്കുന്നത്.
പൃഥ്വിരാജിന്റെ കുറിപ്പ് ഇങ്ങനെ
വർത്തമാനകാലത്ത് അതിവേഗം ഇല്ലാതായിക്കൊണ്ടിരിക്കുന്നു മാധ്യമ ധാർമികത എന്നതിനാൽ സാധാരണഗതിയിൽ ഇത്തരം വ്യാജആരോപണങ്ങളേയും വാർത്തകളേയും ഞാൻ അത് അർഹിക്കുന്ന അവഗണനയോടെ തള്ളിക്കളയാറാണുള്ളത്. എന്നാൽ തീർത്തും വസ്തുതാവിരുദ്ധവും വ്യക്തിപരമായി അധിക്ഷേപകരവുമായ ഒരു “കള്ളം”, വാർത്ത എന്ന പേരിൽ പടച്ചുവിടുന്നത് എല്ലാ മാധ്യമധർമത്തിന്റേയും പരിധികൾ ലംഘിക്കുന്നതാണ്. ഈ വിഷയത്തിൽ നിയമത്തിന്റെ ഏതറ്റം വരെ പോകാനും ഞാൻ ഒരുക്കമാണ്. സിവിലും ക്രിമിനലുമായ എല്ലാ നിയമനടപടികളും സ്വീകരിക്കും.
