ന്യൂഡൽഹി ഇന്ദിരാഗാന്ധി രാജ്യാന്തര വിമാനത്താവളത്തിൽ ദുബായിലേക്കുള്ള യാത്രക്കാരന്റെ ലഗേജിൽ വെടിമരുന്ന് കണ്ടെത്തിയതിനെ തുടർന്ന് യാത്രക്കാരനെ അധികൃതർ തടഞ്ഞു. അംരീഷ് ബിഷ്ണോയി(43) എന്നയാളാണ് ലഗേജിൽ വെടിമരുന്നിന്റെ ആറ് കാട്രിഡ്ജുകളുമായി പിടിയിലായത്.
വെടിമരുന്ന് കൊണ്ടുപോകുന്നതിനുള്ള സാധുവായ രേഖകൾ ഇയാളുടെ കൈവശം ഉണ്ടായിരുന്നില്ല. എന്നാൽ ഉത്തർപ്രദേശ് സർക്കാരിന്റെ അഖിലേന്ത്യാ പിസ്റ്റൾ ലൈസൻസ് ഉണ്ടെന്നായിരുന്നു അംരീഷ് ബിഷ്ണോയി അവകാശ വാദം ഉന്നയിച്ചത്. ബിഷ്‌ണോയിക്കെതിരെ എയർപോർട്ട് പൊലീസ് കേസ് രജിസ്റ്റർ ചെയ്തിട്ടുണ്ടെന്ന് അധികൃതർ അറിയിച്ചു.
ബിഷ്ണോയി എമിറേറ്റ്‌സ് വിമാനത്തിൽ ഡൽഹിയിൽ നിന്ന് ദുബായിലേക്ക് യാത്രചെയ്യാനായിരുന്നു വിമാനത്താവളത്തിൽ എത്തിയത്. എന്നാൽ അംരീഷ് പ്രവാസിയാണോ അതോ സന്ദർശനത്തിന് യുഎഇയിലേക്ക് വരുന്നയാളാണോ എന്ന കാര്യങ്ങളൊന്നും അധികൃതർ ഇതുവരെ വെളിപ്പെടുത്തിയിട്ടില്ല.
