മുൻ മുഖ്യമന്ത്രി ഉമ്മൻ ചാണ്ടിയുടെ ഓർമ്മകൾക്ക് ഇന്ന് ഒരാണ്ട്. പ്രിയനേതാവിൻ്റെ സ്‌മരണയിൽ വിവിധ പരിപാടികളാണ് കോട്ടയത്തും പുതുപ്പള്ളിയിലും വിവിധ ജില്ലകളിലുമായി സംഘടിപ്പിക്കുന്നത്. രാവിലെ 7 മണിക്ക് പുതുപ്പള്ളി പള്ളിയിൽ ഉമ്മൻ ചാണ്ടിയുടെ കബറിടത്തിൽ പ്രത്യേക പ്രാർത്ഥന നടന്നു.
ഒന്നാം ചരമവാർഷികത്തോടനുബന്ധിച്ച് ഓഗസ്‌റ്റ് 26 വരെയാണ് സംസ്ഥാനത്തൊട്ടാകെ വിവിധ പരിപാടികൾ സംഘടിപ്പിച്ചിട്ടുണ്ട്. പുതുപ്പള്ളി സെൻ്റ് ജോർജ് ഓർത്തഡോക്സ് വലിയ പള്ളി അങ്കണത്തിൽ രാവിലെ 11ന് നടക്കുന്ന അനുസ്‌മരണ സമ്മേളനം ഗവർണർ ആരിഫ് മുഹമ്മദ് ഖാൻ ഉദ്ഘാടനം ചെയ്യും. ഓർത്തഡോക്സ് സഭാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാത്തോലിക്കാ ബാവാ അധ്യക്ഷത വഹിക്കും.
കോട്ടയം ഡിസിസി സംഘടിപ്പിക്കുന്ന ഉമ്മൻചാണ്ടി അനുസ്‌മരണം മാമ്മൻ മാപ്പിള ഹാളിൽ വൈകിട്ട് 3ന് എഐസിസി ജനറൽ സെക്രട്ടറി കെ.സി.വേണുഗോപാൽ എംപി ഉദ്ഘാടനം ചെയ്യും. കെപിസിസി പ്രസിഡൻ്റ് കെ.സുധാകരൻ അധ്യക്ഷത വഹിക്കും. തുടർന്ന് ഉമ്മൻചാണ്ടിയുമായി ബന്ധപ്പെട്ട ഫോട്ടോ പ്രദർശനവും നടക്കും.
