ഒമാനിലെ മഴക്കെടുതിയിൽ മരിച്ചവരുടെ എണ്ണം 17 ആയി ഉയർന്നുവെന്ന വാർത്തയാണ് ഇപ്പോൾ പുറത്ത് വരുന്നത്. മരിച്ചവരിൽ ഒരു മലയാളിയും ഉൾപ്പെട്ടിരുന്നു. ഈ ദുരന്തവാർത്തയ്ക്കിടയിൽ ഒരു ആശ്വാസ വാർത്തയും മലയാളികളെ തേടിവരുന്നുണ്ട്.
മഴക്കെടുതിയില്‍ നിന്ന് തലനാരിഴയ്ക്ക് ആലപ്പുഴ സ്വദേശി രക്ഷപ്പെട്ടു. അശ്വിൻ ടൈറ്റസാണ് മഴക്കെടുതിയില്‍ നിന്ന് രക്ഷപെട്ടത്. മഴക്കെടുതിയിൽ മരിച്ച മലയാളി സുനിൽ കുമാറിനൊപ്പമാണ് അശ്വിനും അപകടത്തിൽപ്പെട്ടത്. അപകടത്തിൽ അശ്വിൻ ടൈറ്റാസിന് കാലിന് പരിക്കേറ്റിട്ടുണ്ട്. ഒരു വർഷമായി ഒമാനിൽ ജോലി ചെയ്യുകയാണ് ആലപ്പുഴ സ്വദേശിയായ അശ്വിൻ.
ജോലി ചെയ്യുന്ന ഗാരേജിന്റെ ഉയരത്തിൽ വരെ വെള്ളമെത്തിയെന്നും കിച്ചണിൽ കുടുങ്ങിയവരെ മേൽക്കൂര പൊളിച്ചാണ് രക്ഷിച്ചതെന്നും അശ്വിൻ പറയുന്നു. ആദ്യദിനം തന്നെ പെയ്ത കനത്ത മഴയിൽ പൊടുന്നനെ ഉണ്ടായ വെള്ളപ്പാച്ചിലാണ് മരണസംഖ്യ ഇത്രയും ഉയരാനിടയാക്കിയത്.
