കുട്ടികളെ മാജിക്ക് കാണിച്ച് രസിപ്പിക്കുന്ന പ്രധാനമന്ത്രി നരേന്ദ്ര മോദിയുടെ വിഡിയോ വൈറലാകുന്നു. ബിജെപിയുടെഎക്സ് അക്കൗണ്ടിൽ ഷെയർ ചെയ്തിരിക്കുന്ന വീഡിയോ ആണ് ഇപ്പോൾ സമൂഹ മാധ്യമങ്ങളിൽ തരംഗമായിരിക്കുന്നത്.
‘കുട്ടികളോടൊപ്പം ആകുമ്പോൾ മോദിജി കുട്ടിയെ പോലെയാകുന്നു’ എന്ന അടിക്കുറിപ്പോട് കൂടിയാണ് വീഡിയോ പങ്കുവച്ചിരിക്കുന്നത്. രണ്ട് കുട്ടികൾക്ക് മുൻപിൽ നാണയം കൊണ്ട് മാജിക് ട്രിക്ക് കാണിക്കുന്ന മോദിയെയാണ് വീഡിയോയിൽ കാണാൻ കഴിയുക.
മോദി തന്റെ നെറ്റിയിൽ ഒരു നാണയം വയ്ക്കുകയും തുടർന്ന് തലയുടെ പിൻഭാഗത്ത് തട്ടുകയും ചെയ്യുന്നു. അപ്പോൾ നാണയം കയ്യിലേക്ക് വീഴുന്നുണ്ട്. ശേഷം മോദി കുട്ടികളുടെ അടുത്ത് ഇതേ കാര്യം ചെയ്യാൻ ആവശ്യപ്പെടുന്നു. എന്നാൽ കുട്ടികൾ അങ്ങനെ ചെയ്തപ്പോൾ നാണയം അപ്രത്യക്ഷമാകുന്നതായും കാണാം. മോദിയുടെ വീഡിയോ നിരവധി പേരാണ് പങ്കുവച്ചിരിക്കുന്നത്.
