2023 ഡിസംബർ 31 ന് പുതുവത്സര ആഘോഷങ്ങൾക്കായി ആകെ 2,288,631 യാത്രക്കാർ വിവിധ പൊതുഗതാഗത മാർഗങ്ങൾ ഉപയോഗിച്ചതായി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി അറിയിച്ചു. ദുബായ് മെട്രോയുടെ റെഡ്, ഗ്രീൻ ലൈനുകൾ 974,416 യാത്രക്കാർ ഉപയോഗിച്ചിട്ടുണ്ട്.
അതേസമയം ട്രാമിൽ 56,208 യാത്രക്കാർ യാത്ര ചെയ്തു. പബ്ലിക് ബസുകളിൽ 401,510 പേരും യാത്ര ചെയ്തിട്ടുണ്ട്. കൂടാതെ സമുദ്ര ഗതാഗതത്തിലൂടെ 97,261 പേരും ഇ-ഹെയ്‌ൽ വാഹനങ്ങൾ 167,051 പേരും ഉപയോഗിച്ചിട്ടുണ്ട്. 1,316 വ്യക്തികൾ പങ്കിടുന്ന ഗതാഗത വാഹനങ്ങൾ ഉപയോഗിച്ചു. 590,869 യാത്രക്കാർ ടാക്സികളും ഉപയോഗിച്ചിട്ടുണ്ട്. പുതുവത്സരാഘോഷ വേദികളിലേക്കും പുറത്തേക്കും യാത്രക്കാർക്ക് സുഗമവും സുരക്ഷിതവുമായ യാത്ര സമ്മാനിക്കാൻ കഴിഞ്ഞുവെന്നും ആർടിഎ വ്യക്തമാക്കി.
