സൗദിയിലുള്ള ആശ്രിത വിസക്കാരുടെ പ്രതിമാസ ലെവി പുനഃപരിശോധിക്കാൻ ഒരുങ്ങുന്നുവെന്ന് ധനകാര്യ മന്ത്രി മുഹമ്മദ് അല്‍ജദാന്‍. ഒരു പോഡ്കാസ്റ്റ് ചാനലിലെ ‘സൗദി അറേബ്യയിലെ സാമ്പത്തിക തീരുമാനങ്ങൾക്ക് പിന്നിൽ’ എന്ന വിഷയത്തിൽ സംസാരിക്കവേയാണ് മന്ത്രി ഇക്കാര്യം വെളിപ്പെടുത്തിയത്.
2015 മുതലുള്ള സാമ്പത്തിക മേഖലയിലെ പരിവർത്തന യാത്ര അവലോകനം ചെയ്ത പരിപാടിയിൽ ഈ കാലത്തിനിടയിൽ എടുത്ത ലെവി, വാറ്റ് തുടങ്ങിയ സുപ്രധാന സാമ്പത്തിക തീരുമാനങ്ങളെ കുറിച്ചുംഅദ്ദേഹം സംസാരിച്ചു. ഒരു പ്രത്യേക ഘട്ടത്തിലാണ് രാജ്യത്തുള്ള പ്രവാസികളുടെ കുടുംബാംഗങ്ങളുൾപ്പടെ ആശ്രിത വിസയിലെത്തുന്നവർക്ക് പ്രതിമാസം നിശ്ചിത തുക ലെവിയായി നിശ്ചയിച്ചിരുന്നത്. 2017 മുതൽ ഇത് ഈടാക്കി തുടങ്ങുകയും ചെയ്തിരുന്നു. ഏഴ് വർഷങ്ങൾക്കിപ്പുറം ഇതിൽ ഒരു പുനാരോലചനക്കുള്ള സാധ്യതയാണ് ഇപ്പോൾ തെളിയുന്നതെന്നും അദ്ദേഹം പറഞ്ഞു.
2015 മുതൽ സൗദി സാമ്പത്തിക മേഖലയിൽ പരിവർത്തന യാത്രക്ക് തുടക്കമിടുകയായിരുന്നു. അലവൻസുകൾ നിർത്തലാക്കൽ, മൂല്യവർധിത നികുതി (വാറ്റ്) ചുമത്തൽ, വിദേശികളുടെ ആശ്രിതർക്ക് പ്രതിമാസ ഫീസ് (ലെവി) ചുമത്തൽ തുടങ്ങിയ ബുദ്ധിമുട്ടുള്ള പല സാമ്പത്തിക തീരുമാനങ്ങളും 2016 ലായിരുന്നു സൗദി നടപ്പിലാക്കി തുടങ്ങിയത്.
