കേരള മീഡിയ അക്കാദമിയുടെ മീഡിയ പേഴ്സൺ ഓഫ് ദി ഇയർ പുരസ്‌കാരം അൽജസീറയുടെ ഗസ്സ ബ്യൂറോ ചീഫ് വാഇൽ ദഹ്ദൂദിന്. നിലവില്‍ ഖത്തറിൽ ചികിത്സയിലാണ് ദഹ്ദൂഹ്. ഒരു ലക്ഷം രൂപയും പ്രശസ്തിപത്രവും ശില്‍പവും അടങ്ങുന്നതാണ് പുരസ്‌കാരം. മുഖ്യമന്ത്രി പിണറായി വിജയൻ ദഹ്ദൂഹിന് പുരസ്‌കാരം സമ്മാനിക്കും.
അതേസമയം കേരളത്തില്‍ നിന്നുളള ഈ ബഹുമതി ലഭിക്കുന്നത് അഭിമാനമാണെന്ന് ദഹ്ദൂഹ് അറിയിച്ചതായി മീഡിയ അക്കാദമി ചെയര്‍മാന്‍ ആര്‍.എസ് ബാബു പറഞ്ഞു. ഡിസംബറിൽ ഖാൻ യൂനിസിലെ യു.എൻ സ്‌കൂളിനെതിരായ ആക്രമണം റിപ്പോർട്ട് ചെയ്യുന്നതിനിടെഇസ്രായേൽ നടത്തിയ ഡ്രോൺ ആക്രമണത്തില്‍ ദഹ്ദൂഹിന് പരിക്കേറ്റിരുന്നു. കൂടാതെ ആക്രമണത്തിൽ അദ്ദേഹത്തിന്‍റെ ക്യാമറാമാൻ സാമിർ അബൂ ദഖ കൊല്ലപ്പെടുകയും ചെയ്തു. മാത്രമല്ല, വാഇൽ ദഹ്ദൂഹിന്റെ ഭാര്യയും മക്കളും സഹപ്രവർത്തകരുമെല്ലാം ഇസ്രായേൽ നടത്തിയ വ്യത്യസ്ത ആക്രമണങ്ങളിൽ കൊല്ലപ്പെട്ടിരുന്നു.
പ്രിയപ്പെട്ടവരെല്ലാം മരിച്ചു വീണപ്പോഴും അപാരമായ മനസ്സാന്നിധ്യത്തോടെ യുദ്ധഭൂമിയിൽ ഇസ്രായേലിന്‍റെ ക്രൂരതകൾ അൽ ജസീറയിലൂടെ ലോകത്തിന് മുന്നിലെത്തിച്ചത് വാഇൽ ആയിരുന്നു. ഒക്ടോബർ 28ന് നുസൈറത് അഭയാർഥി ക്യാമ്പിന് നേരെയുണ്ടായ ആക്രമണത്തിലായിരുന്നു വാഇലിന്റെ ഭാര്യയും 15കാരനായ മകനും ഏഴ് വയസുള്ള മകളും ഉൾപ്പെടെ എട്ട് കുടുംബാംഗങ്ങൾ കൊല്ലപ്പെട്ടത്. പ്രിയപ്പെട്ടവരുടെ വിയോഗം സൃഷ്ടിച്ച വലിയ സങ്കടങ്ങൾക്കിടയിലും വാഇൽ ക്യാമറയ്ക്ക് മുന്നിലേക്ക് മടങ്ങിയെത്തി. ജനുവരി ഏഴിനുണ്ടായ ആക്രമണത്തിലാണ് വാഇലിന്റെ മറ്റൊരു മകനും മാധ്യമപ്രവർത്തകനുമായ ഹംസ ദഹ്ദൂഹും കൊല്ലപ്പെട്ടത്.
