റയൽ മാഡ്രിഡിൽ നിന്ന് വിടപറയുന്നു എന്ന് പ്രഖ്യാപിച്ചതിന് പിന്നാലെ കരീം ബെൻസേമ സൗദി ക്ലബിലേക്ക്‌. ജിദ്ദയിലെ അല്‍ ഇത്തിഹാദ് ക്ലബിന് വേണ്ടിയായിരിക്കും ഇനി ബെൻസെമ ബൂട്ടണിയുക എന്നാണ് സൂചന. റയൽ മാഡ്രിഡിന്റെ ക്യാപ്റ്റനായിരുന്നു ബെന്‍സേമ. നീണ്ട 14 വർഷം ക്ലബിനായി കളിച്ച ബെന്‍സേമയുടെ അവസാന മത്സരം ഇന്ന് നടക്കും.
ഏറ്റവും വലിയ ഇതിഹാസങ്ങളിൽ ഒരാളായ ബെൻസെമയോട് നന്ദിയും സ്‌നേഹവും പ്രകടിപ്പിക്കാൻ മാഡ്രിഡ് ആഗ്രഹിക്കുന്നു എന്ന് ക്ലബ് പ്രസ്താവനയിൽ പറഞ്ഞു. ബെൻസേമ മാഡ്രിഡിൽ ഉണ്ടാകും എന്ന മാഡ്രിഡ് പരിശീലകൻ കാർലോ ആൻസലോട്ടി ശനിയാഴ്ച പറഞ്ഞതിന് പിന്നാലെയാണ് ബെൻസെമയുടെ വിടവാങ്ങൽ പ്രഖ്യാപനം.
എന്നാൽ സൗദി അറേബ്യയിലേക്ക് പോകാനുള്ള സാധ്യതകളെ കുറിച്ച് നേരത്തെ ബെൻസേമയോട് ചോദ്യങ്ങൾ ഉന്നയിച്ചിരുന്നു. ഓൺലൈനിൽ വായിക്കുന്നതെല്ലാം യാഥാർഥ്യമാവണം എന്നില്ല എന്നായിരുന്നു ബെൻസെമ മറുപടി നൽകിയത്.
